Rövnəq Abdullayev prezidentlikdən getdi
Fevralın 10-da sərəncam imzalayan prezident İlham Əliyev Rövnəq Abdullayevi Dövlət Neft Şirkətinin prezidenti vəzifəsindən azad edib. Rövnəq Abdullayev bu postu 2005-ci ildən tuturdu.
Başqa bir sərəncamla Rövnəq Abdullayev iqtisadiyyat nazirinin müavini təyin olunub.
Dövlət başçısı Rövşən Nəcəfi iqtisadiyyat nazirinin birinci müavini vəzifəsindən çıxararaq Dövlət Neft Şirkətinin birinci vitse-prezidenti təyin edib. Ona prezident vəzifəsinin müvəqqəti icrası həvalə olunub.
Elnur Əliyev iqtisadiyyat nazirinin müavini vəzifəsindən birinci müavin postuna keçirilib.
Novator.az bildirir ki, 1982-ci il təvəllüdlü Rövşən Nəcəf iqtisadçıdır.
Azərbaycan Dövlət İqtisad Universitetində laborant, İqtisadi İnkişaf Nazirliyində məsləhətçi, baş məsləhətçi, sektor müdiri, Dövlət Neft Şirkətində iqtisadçı, şöbə rəisi vəzifələrini tutub.
İqtisadi İnkişaf Nazirliyində xarici iqtisadi əlaqələr şöbəsinin müdir müavini, müdiri, nazirin köməkçisi vəzifələrində də çalışan Rövşən Nəcəf həmçinin “Azərbaycan İnvestisiya Şirkəti” ASC-nin icraçı direktorunun müavini, icraçı direktoru olub.
2018-2019-cu illərdə Prezident Administrasiyasının innovativ inkişaf və elektron hökumət məsələləri şöbəsinin müdiri postunda çalışıb. 2020-ci ildən iqtisadiyyat nazirinin müavini, 2021-ci ildən nazirin birinci müavini olub.
Dövlət Neft Şirkəti 2020-ci il noyabrın 5-də Azərbaycan İnvestisiya Holdinqinin idarəetməsinə verilib. 2021-ci il yanvarın 23-də SOCAR-ın fəaliyyətinə ümumi rəhbərliyi və nəzarəti həyata keçirmək üçün Müşahidə Şurası yaradılıb. Müşahidə Şurasına sədrlik iqtisadiyyat naziri Mikayıl Cabbarova həvalə olunub.
