Ehtiyatlar qurumunun nizamnaməsi rəsmiləşdi
Fevralın 8-də fərman imzalayan prezident İlham Əliyev Dövlət Ehtiyatları Agentliyinin nizamnaməsini təsdiqləyib. Nizamnaməyə görə, agentlik dövlət və səfərbərlik ehtiyatlarının yaradılması və idarə olunması sahəsində dövlət siyasətinin hazırlanmasında və həyata keçirilməsində iştirak edən, bu sahədə tənzimləməni və nəzarəti həyata keçirən, habelə ölkənin strateji əhəmiyyətli mallarla təchizatının dayanıqlılığını təmin etmək və daxili bazarda həmin mallar üzrə qısamüddətli kəskin qiymət dəyişmələrinin qarşısını almaq istiqamətində tədbirlər görən, habelə Dövlət Taxıl Fondunun sərəncamçısı olan publik hüquqi şəxsdir.
Nazirlər Kabinetinə “Dövlət ehtiyatları haqqında” qanunun layihəsini hazırlayıb dörd ay müddətində prezidentə təqdim etmək, ölkənin istehlak bazarında strateji əhəmiyyətli malların siyahısını təsdiqləmək tapşırılıb.
Dövlət Ehtiyatları Agentliyi prezidentin 7 oktyabr 2021-ci il fərmanı ilə Fövqəladə Hallar Nazirliyinin Dövlət Material Ehtiyatları Agentliyinin əsasında yaradılıb.
2021-ci il dekabrın 27-də Səbuhi Əhəd oğlu Sadıqov Dövlət Ehtiyatları Agentliyinin İdarə Heyətinin sədri təyin edilib.
