İtaliya prezidenti kürsüdə qaldı
Yanvarın 29-u axşam İtaliyada prezident seçkisi yekunlaşıb. Novator.az-ın məlumatına görə, 2015-ci ildən prezidentlik edən, bu seçkidə namizəd olmaq istəməmiş Serco Mattarella yenidən dövlət başçısı postuna mandat alıb. Onun 7 illik ilk səlahiyyət müddəti fevralın 3-də başa çatır.
Dövlət başçısını parlament palataları üzvləri və bölgə təmsilçilərini birləşdirən 1009 nəfərlik kollegiya seçir. İlk üç turda qələbə üçün üçdə iki səs çoxluğu gərək olub. Yanvarın 24-26-da keçirilmiş həmin turlar nəticəsiz qalıb. Yanvarın 27-dən başlayan növbəti turlarda qələbə üçün 505 səs kifayət edib. Ancaq ardıcıl dörd turda da prezidenti seçmək mümkün olmayıb və 1941-ci il təvəllüdlü Serco Mattarella aparıcı siyasi qüvvələrin müraciətini nəzərə alaraq səkkizinci turda namizədliyə razılaşıb, 759 səslə qalib gəlib.
Serco Mattarella 2018-ci ildə Azərbaycanın ali dövlət mükafatı sayılan “Heydər Əliyev” ordeni ilə təltif edilib.
Parlament respublikası olan İtaliyada əsas siyasi fiqur baş nazirdir. Hökumət parlamentin aşağı palatasına (Deputatlar Palatası) və yuxarı palatasına (Senat) seçkilərin nəticələri əsasında qurulur.
