2022-ci ilin dünya futbol çempionatının seçmə mərhələsi davam edir. Novator.az bildirir ki, yanvarın 27-də İran milli komandası Asiyadan final raunduna ilk vəsiqəyə sahib çıxıb. Qalan 3 vəsiqəyə Cənubi Koreya, BƏƏ, Səudiyyə Ərəbistanı, Yaponiya, Avstraliya, Oman iddia edir.

21 noyabr-18 dekabrda Qətərdə keçiriləcək final mərhələsinə 32 vəsiqənin 1-i çempionat sahibi Qətərə verilib.

Avropaya ayrılan 13 yerin 10-u tutulub: Serbiya, İspaniya, İsveçrə, Fransa, Belçika, Danimarka, Niderland, Xorvatiya, İngiltərə, Almaniya.

Son üç vəsiqənin taleyinə 12 komanda yarımfinal və final oyunlarında aydınlıq gətirəcək:

A yolu

Şotlandiya – Ukrayna

Uels – Avstriya

B yolu

Rusiya – Polşa

İsveç – Çexiya

C yolu

İtaliya – Şimali Makedoniya

Portuqaliya – Türkiyə.

Qətərdə Afrikanı 5 komanda təmsil edəcək. Həmin vəsiqələrə namizədlərin cütlükləri belədir:

Misir – Seneqal

Kamerun – Əlcəzair

Qana – Nigeriya

Konqo Demokratik Respublikası – Mərakeş

Mali – Tunis.

Cənubi Amerikadan Braziliya və Argentina final mərhələsinə vəsiqəni təmin ediblər. Qalan 2 biletə iddiaçılar bunlardır: Ekvador, Uruqvay, Kolumbiya, Peru, Çili, Boliviya, Paraqvay.

Şimali və Mərkəzi Amerikanın 3 vəsiqəsi var. Mübarizəni bu yığmalar aparır: Kanada, ABŞ, Meksika, Panama, Kosta Rika, Yamayka, Salvador, Honduras.

2 vəsiqə Asiya təmsilçisi ilə Cənubi Amerika təmsilçisi, Şimali və Mərkəzi Amerika təmsilçisi ilə Okeaniya təmsilçisi arasında əlavə oyunlarda müəyyənləşəcək.

1930-cu ildən keçirilən dünya çempionatlarında Braziliya 5 dəfə, İtaliya və Almaniya 4 dəfə, Uruqvay, Argentina və Fransa 2 dəfə, İngiltərə və İspaniya 1 dəfə qızıl medallara sahib olub.