Artımı artım yeyir
2022-ci ildən fermerlərdən 1 ton pambığın alış qiyməti təxminən 7 faiz (50 manat) artaraq 750 manata yüksəlir. Novator.az-ın məlumatına görə, yeniliyi şərh edən iqtisadçı Rövşən Ağayev yazır: “İşçi qüvvəsi, texnika ilə becərmə və başqa xərclərdəki artımları demirəm, təkcə gübrələrin qiymətində son 1 ilin az qala 50 faizlik artım müqabilində pambığın alış qiymətinin 7 faiz yüksəlməsi yetərli sayıla bilməz.
Son 2 ildə dünya bazarında pambığın qiyməti davamlı artıb. Hazırda 1 ton pambığın (mahlıcın) ixrac qiyməti 2600 dolları ötür. Bu, 2020-ci ilin mart ayı ilə müqayisədə 35 faiz yuxarı qiymətdir”.
Ekspert Azərbaycan hökumətinin fermerlərə təhvil verdikləri pambığın hər tonuna görə 170 manat subsidiya ödəyəcəyini xatırladır: “Subsidiya nəzərə alınmaqla hər ton pambığın fermer üçün satış qiyməti 920 manata təşkil edəcək. Ancaq becərmə xərclərinin çox yüksək artım tempi pambıq əkinlərində onsuz da aşağı olan mənfəəti azaldacaq”.
