Eldar Həsənova hökm oxundu

21 Yanvar 2022
comments
hikmet
Posted in Manşet Xəbər

Yanvarın 21-də Bakı Ağır Cinayətlər Məhkəməsi dövlət xadimi Eldar Həsənova 10 il müddətinə azadlıqdan məhrumetmə cəzası kəsib. Hökm Eldar Həsənovun 3 il müddətinə dövlət və yerli özünüidarəetmə orqanlarında rəhbər və maddi məsul vəzifə tutma hüququndan məhrum olunmasını, ona məxsus olduğu iddia edilən bəzi əmlakların müsadirəsini də nəzərdə tutur.

Azadliq.org-un məlumatına görə, hökmdən əvvəl son sözlə çıxış edən Eldar Həsənov ittihamların əsassız olduğunu deyərək bəraət istəyib. O deyib ki, bir məmurun uzun illərdir davam edən düşmənçiliyinin nəticəsində qondarma ittihamlarla həbsdədir: “Mənim siyasi iddiada olmağım, müxalifətlə iş birliyi qurmağım barədə əsassız iddialar irəli sürüblər. Bunu özümə qarşı böyük mənəvi-psixoloji zərbə hesab edirəm. Özümlə yanaşı qardaşlarım, qohumlarım təqib olunur, əmlaklarımızın üzərinə qanunsuz həbs qoyulub”.

Eldar Həsənov həmçinin deyib ki, bəzi müsahibələrində Rusiyanın xarici işlər naziri Sergey Lavrovu tənqid etməsi, 1992-ci ilin Xocalı faciəsində rus qoşunlarının iştirakı haqda səsləndirdiyi fikirlər müəyyən şəxslərin xoşuna gəlməyib.

Onun sözlərinə görə, 2019-cu ilin fevralında Serbiyadan Ermənistana silah satışı haqda məlumatı rəsmi şəkildə Xarici İşlər Nazirliyinə təqdim edib: “Bunu faktlarla sübut etmişəm. Serbiya bunu təkzib etsə də, yenidən faktı Xarici İşlər Nazirliyinə təqdim etdim. Görünür, bu hərəkətim kimlərinsə xoşuna gəlməyib və prezidentə başqa cür təqdim ediblər”.

Dövlət Təhlükəsizliyi Xidmətinin istintaq təcridxanasında saxlanan Eldar Həsənovun məhkəməsi 2021-ci il sentyabrın 3-dən gedirdi.

Eldar Həsənov 1955-ci il oktyabrın 10-da Kəlbəcərin Laçın kəndində doğulub. Bakıda indiki Azərbaycan Texniki Universitetini elektronika mühəndisi ixtisası, Moskvada SSRİ Daxili İşlər Nazirliyinin Akademiyasını hüquqşünas ixtisası ilə bitirib.

1977-ci ildən Azərbaycanın Daxili İşlər Nazirliyi sistemində çalışıb, müfəttiş, baş müfəttiş, cinayət-axtarış şöbəsinin rəis müavini, rəisi postlarını tutub, Bakının Nizami rayonunun, Gəncə şəhərinin milis rəisi, İnterpolun Milli Mərkəzi Bürosunun rəisi, daxili işlər nazirinin birinci müavini olub.

1993-1995-ci illərdə baş prokurorun birinci müavini, 1995-2000-ci illərdə baş prokuror vəzifəsində xidmət edib. Ədliyyə general-leytenantıdır.

2001-ci il martın 28-dən Eldar Həsənov Azərbaycanın Rumıniyada fövqəladə və səlahiyyətli səfiri olub, 2009-cu il sentyabrın 14-dən ölkəni həmçinin Serbiyada, 2010-cu il iyulun 28-dən eyni zamanda Monteneqroda, həmin il avqustun 31-dən həmçinin Bosniya və Herseqovinada təmsil edib. 2013-cü il martın 28-də onun Rumıniyadakı təmsilçiliyinə xitam verilib.

2020-ci il avqustun 13-ü Bakıda tutulan, avqustun 17-də səfir postundan çıxarılan Eldar Həsənovun ibtidai istintaqını Baş Prokurorluğun İstintaq İdarəsi aparıb. Ona 2010-2020-ci illərdə maliyyə pozuntularına yol verilməsi, dövlətə külli miqdarda ziyan vurulması ittihamları irəli sürüb.

Eldar Həsənovun hüquqlarını dörd vəkil qoruyur: Cavad Cavadov, Valeh Mehralıyev, Adəm Məmmədov, Cəlil Mirzəyev.

Gəncə Pedaqoji Universitetinin müəllimi, Azərbaycan Pedaqoji Universitetinin dosenti olmuş Eldar Həsənov hüquq elmləri doktoru, professordur. Mütəşəkkil cinayətkarlıq, xüsusilə terrorizm və narkotik vasitələrin qanunsuz dövriyyəsinə dair və digər mövzularda kitabların, dərslik və dərs vəsaitlərinin, elmi və publisistik əsərlərin müəllifidir.

About author

Son materiallar

Tags

Rəylər

Do not miss

Son materiallar