Yanvarın 14-də Ukraynaya işgüzar səfər edən prezident İlham Əliyev Kiyevin Borispol Beynəlxalq Hava Limanında qarşılanıb.

Dövlət başçısının ukraynalı həmkarı Vladimir Zelenski ilə təkbətək bir araya gəldiyi bildirilir.

Geniş tərkibdə də görüş keçirilib. Bunun ardınca prezidentlərin iştirakı ilə Azərbaycan-Ukrayna sənədləri imzalanıb. Sənədlər bunlardır:

Azərbaycan Respublikası prezidentinin və Ukrayna prezidentinin birgə bəyannaməsi;

Ukrayna Nazirlər Kabineti ilə Azərbaycan Respublikası Hökuməti arasında “Qida təhlükəsizliyi sahəsində əməkdaşlıq haqqında” saziş;

Ukraynanın İqtisadiyyat Nazirliyi və Azərbaycan Respublikasının İqtisadiyyat Nazirliyi arasında “İkitərəfli ticarətdə təcili əməkdaşlıq haqqında” anlaşma memorandumu;

Ukrayna Aqrar Siyasət və Ərzaq Nazirliyi ilə Azərbaycan Respublikasının İqtisadiyyat Nazirliyi arasında “Aqrar sahədə əməkdaşlıq haqqında” anlaşma memorandumu;

“Neft-qaz Ukrainı” Milli Səhmdar Şirkəti” Səhmdar Cəmiyyəti ilə Azərbaycan Dövlət Neft Şirkəti – SOCAR arasında “Energetika sahəsində əməkdaşlıq haqqında” anlaşma memorandumu;

Ukraynanın Geodeziya, Kartoqrafiya və Kadastr üzrə Dövlət Xidməti ilə Azərbaycan Respublikasının İqtisadiyyat Nazirliyi arasında “Torpaq münasibətləri, dövlət torpaqlarının idarə edilməsi və dövlət torpaq kadastrı sahəsində əməkdaşlıq haqqında” anlaşma memorandumu.

İmza mərasimindən sonra mətbuata bəyanatında İlham Əliyev deyib ki, müstəqillik dövründə Ukrayna və Azərbaycan hər zaman bir-birinin müstəqilliyini, ərazi bütövlüyünü, suverenliyini dəstəkləyib və bu dəstək bu gün birgə imzalanan birgə bəyannamədə də öz əksini tapır: “Bizim əməkdaşlığımızın təməlində dostluq əlaqələri dayanır və ümid edirəm ki, bu gün ilin əvvəlində həyata keçirilən bu səfər həm bu ili ikitərəfli müstəvidə yaxşı nəticələrlə başa vurmağa xidmət göstərəcək, həm də gələcək illər üçün gözəl zəmin olacaq”.