Dini Qurumlarla İş üzrə Dövlət Komitəsi sədrinin birinci müavini Səyyad Salahlı “Şöhrət” ordeni ilə təltif edilib. Prezident İlham Əliyevin 14 yanvar sərəncamında təltif Səyyad Salahlının dövlət qulluğunda səmərəli fəaliyyəti ilə əsaslandırılıb.
Novator.az bildirir ki, yanvarın 15-də Səyyad Salahlının 70 yaşı tamam olur.
1952-ci il təvəllüdlü Səyyad Salahlı Azərbaycan Dövlət Pedaqoji Universitetinin filologiya fakültəsini və Bakı Dövlət Universitetinin hüquq fakültəsini bitirib. Filologiya elmləri namizədidir.
Uzun illər pedaqoji fəaliyyət göstərib, 1992-1995-ci ildə “Səs” qəzetində baş redaktorun birinci müavini postunu tutub.
1995-2005-ci illərdə Milli Məclisin deputatı, 2006-2010-cu illərdə Azərbaycanın Türkiyənin İstanbul şəhərində baş konsulu olub.
Dini Qurumlarla İş üzrə Dövlət Komitəsi sədrinin birinci müavini vəzifəsinə 2012-ci ildə təyin edilib.
“Tərəqqi” medalı və əməkdar jurnalist fəxri adı ilə təltif olunub. Siyasi-publisistik və bədii kitabların müəllifidir.
