2022-ci ilin ilk günlərindən Azərbaycanda çörək 10-20 qəpik arası bahalaşıb. Yanvarın 12-də bir qrup jurnalistə müsahibəsində bu məsləyə toxunan prezident İlham Əliyev deyib: “Çörəyin qiymətinin qalxması qaçılmaz idi. Dünyada taxılın, buğdanın qiyməti kəskin artıb. Ən ucuz buğdanı Rusiyadan alırıq. Orada həm qiymətlər, həm də ixrac rüsumları artıb və artmaqda davam edir. Təbii ki, biz çörəyin qiymətini süni şəkildə əvvəlki səviyyədə saxlaya bilməzdik”.

Novator.az-ın məlumatına görə, AXCP sədri Əli Kərimli dövlət başçısının sözlərini etirazla qarşılayıb. O yazır: “İlham Əliyevin belə bəyanatlar verməyə haqqı yoxdur. Ona görə ki, beynəlxalq şirkətlərin “Azəri-Çıraq-Günəşli” neft yataqları blokundan çıxarıb hökumətə havayı verdiyi səmt qazı xalqımıza Gürcüstana, Bolqarıstana satılan qazın qiymətinə satılır. Xalqa satılan malın neçəyə başa gəlməsi ancaq buğdada yada düşür? Hökumətin havayı, pulsuz əldə etdiyi qaz nəyə görə vətəndaşa bu qədər baha satılır?

Nefti də xaricdən alırıq? Nəyə görə Azərbaycan torpağından çıxarılan yanacaq – benzin, dizel xalqa bu qədər baha satılır?

Dünya bazarında qiymətlərin qalxmasına görə buğda almaq xərcimiz bir neçə yüz milyon dollar artıbsa, neftin qiymətinin yenə də həmin dünya bazarında qalxması nəticəsində əldə etdiyimiz qazanc da 2-3 milyard dollar artıb. Neftin qiymətinin artması nəticəsində əldə etdiyimiz əlavə qazancın cəmi 10-15 faizi ilə buğdanın artan qiymətini kompensasiya etmək olmazdımı? Əlbəttə, çox asanlıqla etmək olardı. Ancaq bunu etmək üçün xalqın hazırda çəkdiyi acıları başa düşmək lazım idi”.