Cəmil Həsənlinin yeni kitabı
Londonda tarix elmləri doktoru Cəmil Həsənlinin kitabı çapdan çıxıb.
Novator.az bildirir ki, 1952-ci il təvəllüdlü Cəmil Həsənli Bakı Dövlət Universitetinin tarix fakültəsində müəllim, baş müəllim, dosent və professor vəzifələrində çalışıb.
1993-cü ilin aprel-sentyabr aylarında Azərbaycan prezidentinin müşaviri vəzifəsini tutub.
Azərbaycan Xalq Cəbhəsi Partiyası sədrinin müavini olub. 2000 və 2005-ci illərdə Milli Məclisin deputatı seçilib.
2013-cü ildə yaradılmış Demokratik Qüvvələrin Milli Şurasının sədridir.
Cəmil Həsənlinin yeni kitabı barədə məlumat yayan AXCP sədri, Demokratik Qüvvələrin Milli Şurasının Koordinasiya Mərkəzinin üzvü Əli Kərimli qeyd edir ki, soyuq müharibənin əvvəlinin – 1945-1947-ci illərin sovet siyasətinə dair kitab alimin London Universitetində bir il apardığı elmi araşdırmaların nəticəsidir: “Bu kitab Cəmil Həsənlinin ABŞ və Böyük Britaniyada nəşr edilən 8-ci, Azərbaycanda və dünyanın müxtəlif ölkələrində çıxan 39-cu kitabıdır.
Cəmil müəllim yaxın vaxtlarda oxucuları olduqca vacib bir kitabla sevindirəcək. O, başqa həmkarı ilə birlikdə Qarabağın Rusiya işğalından sovetlərin çökməsinə qədər tarixini əhatə edən kitabı başa çatdırmaq üzrədir, nəşriyyatlarla danışıqlar aparılır.
Cəmil Həsənli prinsipial, qətiyyətli və uzlaşdırıcı siyasətçidir, zülmə, haqsızlığa heç vaxt susmayan sanballı ziyalıdır. Azərbaycanı dünyaya tanıtdıran, başımızı uca edən, dünya miqyaslı alimdir. Qədrini bilək!”
