“Şöhrət”li 70
Prezident İlham Əliyev iqtisadiyyat nazirinin müavini Sahib Ələkbərovu “Şöhrət” ordeni ilə təltif edib. Yanvarın 10-da, Sahib Ələkbərovun 70 illik yubileyi günündə imzalanan sərəncamda təltif nazir müavininin dövlət qulluğunda səmərəli fəaliyyəti ilə əsaslandırılıb.
1952-ci il təvəllüdlü Sahib Ələkbərov Azərbaycan Neft və Kimya İnstitutunu (indiki Azərbaycan Dövlət Neft və Sənaye Universiteti), Moskva İctimai Elmlər Akademiyasını bitirib.
Azərbaycanın dəmir yolu sistemində mühəndis vəzifəsində çalışıb, komsomol və partiya orqanlarında rəhbər postlar tutub, özəl sahələrdə fəaliyyət göstərib.
Səbail Rayon İcra Hakimiyyətinin başçısı, Dövlət Statistika Komitəsi sədrinin müavini, vergilər nazirinin müavini olub.
İqtisadiyyat nazirinin müavini vəzifəsinə 2020-ci ildə təyin edilib.
