Eldar Həsənovun vəkili müqayisə aparır

07 Yanvar 2022
comments
hikmet
Posted in Aktual Manşet Xəbər

Dövlət xadimi Eldar Həsənovun vəkili Valeh Mehralıyev yanvarın 7-də Novator.az saytına açıqlama verib.

O, Bakı Ağır Cinayətlər Məhkəməsində həmin gün keçirilmiş prosesdə dövlət ittihamçısının Eldar Həsənova 11 il azadlıqdan məhrumetmə cəzası istəməsinə belə münasibət bildirib: “Hamıya məlumdur ki, Eldar Həsənov Xarici İşlər Nazirliyinin bir neçə məmuruna qaldırılmış cinayət işi üzrə araşdırmalar zəminində həbs edilib, sonra onun işi başqa icraata ayrılıb. Xarici İşlər Nazirliyinin məmurları olmuş şəxslər həm ibtidai istintaq, həm də məhkəmə istintaqı dövründə ev dustağı olublar, sonda da şərti cəzaya məhkum ediliblər. Eldar Həsənova isə 11 il azadlıqdan məhrumetmə cəzası verilməsi təklif olunur. İbtidai istintaq dövründə vəkillərin təkcə qətimkan tədbirinin dəyişdirilməsi ilə bağlı irəli sürdükləri 27 vəsatətin rədd olunması da bir ayrı göstəricidir”.

Eldar Həsənovun hüquqlarını daha üç vəkil qoruyur: Adəm Məmmədov, Cavad Cavadov, Cəlil Mirzəyev.

Novator.az-a 7 yanvar açıqlamasında Valeh Mehralıyev həmçinin qeyd edib ki, dövlət ittihamçısı cəza təklifi çıxışında müdafiə tərəfinin öz müdafiəsini ittiham tərəfinin təqdim etdiyi sübutlar əsasında qurduğunu deyib: “Deyəsən, dövlət ittihamçısı unudub ki, bizim istər istintaq, istərsə də məhkəmə dövründə təqdim etdiyimiz bütün sübutlar, verdiyimiz bütün vəsatətlər rədd edilib. Belə olan halda biz müdafiəmizi nəyin əsasında qurmalıyıq?!”

Bakı Ağır Cinayətlər Məhkəməsindəki 7 yanvar iclasında dövlət ittihamçısı Eldar Həsənovun 3 il müddətinə vəzifə tutma hüququndan məhrum edilməsini və əmlaklarının müsadirəsini də istəyib.

Proses vəkillərin müdafiə çıxışı ilə davam etməlidir.

Eldar Həsənov 1955-ci il oktyabrın 10-da Kəlbəcərin Laçın kəndində doğulub. Bakıda indiki Azərbaycan Texniki Universitetini elektronika mühəndisi ixtisası, Moskvada SSRİ Daxili İşlər Nazirliyinin Akademiyasını hüquqşünas ixtisası ilə bitirib.

1977-ci ildən Azərbaycanın Daxili İşlər Nazirliyi sistemində çalışıb, müfəttiş, baş müfəttiş, cinayət-axtarış şöbəsinin rəis müavini, rəisi postlarını tutub, Bakının Nizami rayonunun, Gəncə şəhərinin milis rəisi, İnterpolun Milli Mərkəzi Bürosunun rəisi, daxili işlər nazirinin birinci müavini olub.

1993-1995-ci illərdə baş prokurorun birinci müavini, 1995-2000-ci illərdə baş prokuror vəzifəsində xidmət edib. Ədliyyə general-leytenantıdır.

2001-ci il martın 28-dən Eldar Həsənov Azərbaycanın Rumıniyada fövqəladə və səlahiyyətli səfiri olub, 2009-cu il sentyabrın 14-dən ölkəni həmçinin Serbiyada, 2010-cu il iyulun 28-dən eyni zamanda Monteneqroda, həmin il avqustun 31-dən həmçinin Bosniya və Herseqovinada təmsil edib. 2013-cü il martın 28-də onun Rumıniyadakı təmsilçiliyinə xitam verilib.

Baş Prokurorluğun İstintaq İdarəsi 2020-ci il avqustun 13-ü Bakıda tutulan, avqustun 17-də səfir postundan çıxarılan Eldar Həsənova 2010-2020-ci illərdə maliyyə pozuntularına yol verilməsi, dövlətə külli miqdarda ziyan vurulması ittihamları irəli sürüb. Eldar Həsənov ittihamları rədd edir.

Dövlət Təhlükəsizliyi Xidmətinin istintaq təcridxanasında saxlanan Eldar Həsənov 2021-ci il sentyabrın 3-dən mühakimə olunur. Prosesə hakim Əfqan Hacıyev sədrlik edir.

Gəncə Pedaqoji Universitetinin müəllimi, Azərbaycan Pedaqoji Universitetinin dosenti olmuş Eldar Həsənov hüquq elmləri doktoru, professordur.

Mütəşəkkil cinayətkarlıq, xüsusilə terrorizm və narkotik vasitələrin qanunsuz dövriyyəsinə dair və digər mövzularda kitabların, dərslik və dərs vəsaitlərinin, elmi və publisistik əsərlərin müəllifidir.

About author

Son materiallar

Tags

Rəylər

Do not miss

Son materiallar