Omikron çıxandan koronavirusa yoluxan uşaqların sayı artıb
Omikron variantı ortaya çıxandan uşaqlar arasında koronavirusa yoluxmalar artıb.
Novator.az saytı CNN kanalına istinadla bildirir ki, omikronun ən çox yayıldığı ölkələrdən olan ABŞ-da ötən həftə hər gün 700-ə yaxın uşaq koronavirus diaqnozu ilə xəstəxanaya yerləşdirilib.
Ötən həftə ABŞ-da ümumilikdə 325 min uşaqda koronavirus aşkarlanıb. Bu, əvvəlki dövrlərlə müqayisədə ən yüksək göstəricidir.
2021-ci ilin noyabrından ABŞ-da 5-11 yaşlı uşaqlar da koronavirus infeksiyası əleyhinə peyvəndlənir.
ABŞ-da 5-11 yaşlarında 28 milyon uşaq var.
Koronavirusun omikron variantı ilk dəfə 2021-ci ilin noyabrında Cənubi Afrikada aşkarlanıb. Omikron delta variantından daha təhlükəsiz sayılır, amma o, deltadan və koronavirusun digər növlərindən daha sürətlə yayılmağa qadirdir.
İlk dəfə 2019-cu ilin dekabrında Çində üzə çıxan koronavirus infeksiyasına indiyədək dünyada 295 milyondan çox adam yoluxub.
Mənbə: CNN.com
