İsrail hökuməti ölkədə bir adamın eyni vaxtda həm qripə, həm də koronavirusa yoluxması halının aşkarlandığını təsdiqləyib.

Novator.az saytı “The Times of İsrael” qəzetinə istinadla xəbər verir ki, hökumət bu halın koronavirus əleyhinə peyvənd olunmamış hamilə qadında aşkar edildiyini bildirib. Həmin qadının sağaldığı və artıq xəstəxanadan evə buraxıldığı qeyd olunub.

Alimlər eyni vaxtda həm qripə, həm də koronavirusa yoluxma halını flurona adlandırırlar.

Bəzi mənbələr İsraildəki hadisəni dünyada ilk flurona halı kimi təqdim edib. Ancaq bu, yanlışdır. Flurona halı 2020-ci ilin yazında ABŞ-da da qeydə alınıb.

Ağır flurona halına hələ rast gəlinmədiyi vurğulanır.

Qriplə koronavirusun simtomları bir-birinə bənzəyir. Hər iki infeksiya əsasən hava-damcı yoluyla yayılır.

Mənbə: Timesofisrael.com