Parkda
Dekabrın 30-da prezident İlham Əliyev və birinci vitse-prezident Mehriban Əliyeva Bakının Xətai rayonundakı Nizami Gəncəvi adına mədəniyyət və istirahət parkında yaradılan şəraitlə tanış olublar.
AZƏRTAC bildirir ki, 11,2 hektar ərazisi olan parkdakı inzibati binalarda əsaslı təmir və yenidənqurma işləri həyata keçirilib, süni göl yaradılıb, amfiteatr və yay kinoteatrı yenidən qurulub, iki fəvvarə kompleksi və müasir tipli işıqlandırma sistemi yaradılıb.
Parkda müasir söhbətgahlar, müxtəlif ölçülü oturacaqlar, idman qurğuları quraşdırılıb, uşaq əyləncə kompleksi yaradılıb.
Yay kinoteatrının qarşısında çay daşlarından qədim tipli yeni qala divarı tikilib. Parkın ərazisində yaşıllaşdırma işləri görülüb, minlərlə ağac-kol və dekorativ bəzək bitkiləri əkilib.
