Açıqlıq zərurəti
İqtisadçı Rövşən Ağayev dövlət qurumlarının bir çox vacib bilgini açıqlamaması probleminə toxunub. Novator.az-ın məlumatına görə, ekspert yazır ki, Mərkəzi Bank şəffaflıq sarıdan dövlət qurumlarının önündə getməyə borclu təsisatdır: “Ölkəyə investor axını istənirsə, Mərkəzi Bank hesabatlılığın və şəffaflığın nümunəsini yaratmalıdır. Amma Mərkəzi Bank elementar məlumatları açıqlamağı da vəzifə bilmir. Məsələn, niyə manatın effektiv məzənnələrinə dair müqayisəli və izahedici məlumatların əks olunduğu geniş aylıq hesabat açıqlanmır? Yalnız indeksləri açıqlamaqla iş bitmir axı.
Azərbaycan manatının effektiv məzənnələrinin (nominal və real) hesablanmasında iştirak edən ticarət tərəfdaşlarının sayı, səbətdə onların hər birinin ticarət ağırlığı necə olub, həmin ölkələrdə inflyasiyanın səviyyəsi necə dəyişib? Hər bir ticarət tərəfdaşına münasibətdə manatın həm nominal, həm də real effektiv məzənnəsi necə dəyişib?
Mərkəzi Bank yalnız bütün ticarət tərəfdaşlarına münasibətdə cəmlənmiş orta göstəricini açıqlayır. Siz Qazaxıstan təngəsinə və ya Türkiyə lirəsinə münasibətdə manatın real məzənnəsi barədə məlumat ala bilmirsiniz. Mərkəzi Bank bu ölkələrin ticarət çəkiləri əsasında aqreqasiya edilmiş göstərici açıqlayır.
İnvestorlar, ö cümlədən xarici ticarətlə məşğul olanlar üçün hər bir ölkə üzrə analoji məlumatların açıqlanması son dərəcə vacibdir. Müstəqil təhlil institutları isə bu məlumatları əsas götürərək alternativ hesablamalar apara, rəsmi hesablamaların nə dərəcədə etibarlı olduğunu daim diqqətdə saxlaya bilərlər”.
