Dövlət Ehtiyatları Agentliyinə rəhbər təyin edildi
Səbuhi Əhəd oğlu Sadıqov Dövlət Ehtiyatları Agentliyinin İdarə Heyətinin sədri təyin edilib. Prezident İlham Əliyev dekabrın 27-də belə sərəncam imzalayıb.
Dövlət Ehtiyatları Agentliyi prezidentin 7 oktyabr 2021-ci il fərmanı ilə Fövqəladə Hallar Nazirliyinin Dövlət Material Ehtiyatları Agentliyinin əsasında publik hüquqi şəxs kimi yaradılıb, Dövlət Taxıl Fondu onun sərəncamına keçib.
Missiyasına görə, agentlik dövlət və səfərbərlik ehtiyatlarının yaradılması sahəsində dövlət siyasətinin hazırlanmasında və həyata keçirilməsində iştirak edir, bu sahədə tənzimləməni və nəzarəti həyata keçirir, habelə ölkənin strateji əhəmiyyətli mallarla təchizatının dayanıqlığını təmin etmək və daxili bazarda həmin mallar üzrə qısamüddətli kəskin qiymət dəyişmələrinin qarşısını almaq istiqamətində tədbirlər görür.
