Prezident İlham Əliyev dekabrın 27-də Azərbaycan Dövlət İnformasiya Agentliyinin – AZƏRTAC-ın Bakıdakı yeni binası ilə tanış olub. Bina paytaxtın Atatürk prospekti, 70 ünvanında inşa olunub, zirzəmi qatı (avtodayanacaq) ilə birlikdə 9 mərtəbədən ibarətdir.

Əvvəlki bina Bülbül prospekti, 18-də idi.

AZƏRTAC-ın əsası 1920-ci il martın 1-də qoyulub. Hazırda agentlik dövlətin və cəmiyyətin həyatının müxtəlif sahələrinə aid informasiya toplayan, onu yerli və xarici kütləvi informasiya vasitələrinə, Azərbaycan Respublikasının dövlət orqanlarına, fiziki və hüquqi şəxslərinə çatdıran, Azərbaycan Respublikasını regional və beynəlxalq media qurumlarında təmsil edən publik hüquqi şəxsdir.