Avropa Məhkəməsinin Eldar Həsənov qərarı icra olunmur

27 Dekabr 2021
comments
hikmet
Posted in Manşet Xəbər

Məhbus dövlət xadimi Eldar Həsənovun vəkili Cavad Cavadov dekabrın 27-də açıqlama yayıb. Novator.az-ın məlumatına görə, vəkil Avropa İnsan Hüquqları Məhkəməsinin 19 noyabr 2021-ci il qərarını xatırladaraq yazır ki, həmin qərara əsasən, Eldar Həsənov ixtisaslı həkimlərin müvafiq saydığı tibbi müalicə ilə təmin olunmalıdır: “Lakin Avropa Məhkəməsinin qərarına əməl olunmur, Eldar Həsənovun yanına heç bir ixtisaslı həkim buraxılmır, məhkəmə bununla bağlı bütün vəsatətləri rədd edir”.

Eldar Həsənov 1955-ci ildə Kəlbəcərin Laçın kəndində doğulub. Bakıda indiki Azərbaycan Texniki Universitetini elektronika mühəndisi ixtisası, Moskvada SSRİ Daxili İşlər Nazirliyinin Akademiyasını hüquqşünas ixtisası ilə bitirib.

1977-ci ildən Azərbaycanın Daxili İşlər Nazirliyi sistemində çalışıb, müfəttiş, baş müfəttiş, cinayət-axtarış şöbəsinin rəis müavini, rəisi postlarını tutub, Bakının Nizami rayonunun, Gəncə şəhərinin milis rəisi, İnterpolun Milli Mərkəzi Bürosunun rəisi, daxili işlər nazirinin birinci müavini olub.

1993-1995-ci illərdə baş prokurorun birinci müavini, 1995-2000-ci illərdə baş prokuror vəzifəsində xidmət edib. Ədliyyə general-leytenantıdır.

2001-ci il martın 28-dən Eldar Həsənov Azərbaycanın Rumıniyada fövqəladə və səlahiyyətli səfiri olub, 2009-cu il sentyabrın 14-dən ölkəni həmçinin Serbiyada, 2010-cu il iyulun 28-dən eyni zamanda Monteneqroda, həmin il avqustun 31-dən həmçinin Bosniya və Herseqovinada təmsil edib. 2013-cü il martın 28-də onun Rumıniyadakı təmsilçiliyinə xitam verilib.

2020-ci il avqustun 13-də Dövlət Təhlükəsizliyi Xidməti Xarici İşlər Nazirliyinin fəaliyyət istiqamətləri üzrə maliyyə yoxlamaları zəminində Serbiya, Monteneqro, Bosniya və Herseqovinadakı səfir Eldar Həsənovun tutulduğunu açıqlayıb.

Avqustun 14-də Səbail Rayon Məhkəməsi Eldar Həsənov barəsində həbs qətimkan tədbiri seçib.

Eldar Həsənova maliyyə pozuntularına yol verilməsi, dövlətə külli miqdarda ziyan vurulması üzrə ittihamlar irəli sürülüb. O, ittihamları rədd edir.

Həbs olunduğu gündən Dövlət Təhlükəsizliyi Xidmətinin istintaq təcridxanasında saxlanan Eldar Həsənov Bakı Ağır Cinayətlər Məhkəməsində 2021-ci il sentyabrın 3-dən mühakimə olunur.

Prosesə məhkəmə sədrinin müavini Əfqan Hacıyev sədrlik edir, hakimlər kollegiyasına Əhməd Quliyev və Zeynal Ağayev də daxildir.

Bir çox xəstəlikdən əziyyət çəkən Eldar Həsənovun səhhəti həbsdə ciddi formada ağırlaşıb, həyatı təhlükə altına düşüb. Lakin vəkillərinin Eldar Həsənovun həbsdən buraxılması, müalicə olunması barədə vəsatət və müraciətləri təmin olunmayıb.

2021-ci il mayın 7-də və iyunun 23-də Avropa İnsan Hüquqları Məhkəməsi Eldar Həsənovun təcili olaraq Dövlət Təhlükəsizliyi Xidmətinin Bakıdakı Hərbi Hospitalına yerləşdirilməsi, zəruri müayinələrdən keçirilməsi, müalicə olunması, onunla bağlı tibbi əməliyyatlar aparılmasına şərait yaradılması barədə iki qərar çıxarıb.

İyulun 2-də Eldar Həsənov Dövlət Təhlükəsizliyi Xidmətinin istintaq təcridxanasından qurumun Hərbi Hospitalına köçürülüb, bir neçə gün sonra orada bağırsağından əməliyyat olunub, sonra təcridxanaya qaytarılıb.

Lakin bir qədər sonra Eldar Həsənovun səhhəti yenidən pisləşib və o, avqustun 2-dən 17-dək yenə Dövlət Təhlükəsizliyi Xidmətinin Hərbi Hospitalında müalicə almalı olub.

Səhhəti ağır olaraq qalan Eldar Həsənov oktyabrın 15-də yenidən Hərbi Hospitala aparılıb, oktyabrın 17-də təkrarən istintaq təcridxanasına qaytarılıb.

Noyabrın 19-da Avropa İnsan Hüquqları Məhkəməsi Eldar Həsənovla bağlı daha bir qərar qəbul edib. Qərarda Azərbaycan hökumətindən Eldar Həsənova adekvat, yüksək ixtisaslı, o cümlədən stasionar qaydada tibbi yardım göstərilməsi üçün bütün zəruri tədbirlərin həyata keçirilməsi, Eldar Həsənov həbsdə qaldığı təqdirdə ona göstərilən tibbi yardım və onun sağlamlıq durumu haqda mütəmadi olaraq Avropa Məhkəməsinin məlumatlandırılması tələb olunur.

About author

Son materiallar

Tags

Rəylər

Do not miss

Son materiallar