ADR Partiyasında təyinat və seçimlər
Azərbaycan Demokratiya və Rifah (ADR) Partiyası Ali Məclisinin 26 dekabr sessiyasında sədr müavinləri təqdim olunub. Novator.az-ın məlumatına görə, Ədalət Yusub partiya sədrinin təşkilati məsələlər üzrə müavini, Adil Qeybulla strategiyalar və siyasətlər üzrə müavini, Samir Abbaslı demokratik təsisatlarla və ictimaiyyətlə əlaqələr üzrə müavini, Əlövsət Talışxanlı özəl institutlar və sahibkarlarla iş üzrə müavini, Rüfət Muradlı türk dünyası ilə əlaqələr və diasporla iş üzrə müavini vəzifəsinə təsdiqləniblər.
Ellada Məmmədli İcra Aparatının rəhbəri postuna təyinat alıb.
Partiya sədrinin müşavirlərinin təyin olunduğu, Ali Məclisin komissiya sədrlərinin seçildiyi də xəbər verilir.
Məlumata görə, həmçinin ADR Partiyasının 2022-ci il üçün fəaliyyət proqramı qəbul olunub.
ADR Partiyasının təsis qurultayı oktyabrın 17-də internet vasitəsilə keçirilib. 2015-ci ildən fəaliyyət göstərən Azərbaycan Demokratiya və Rifah Hərəkatının bazasında yaradılan partiyaya Qubad İbadoğlu sədrlik edir.
Noyabrın 11-də partiyanın sənədləri dövlət qeydiyyatı üçün Ədliyyə Nazirliyinə təqdim olunub.
Siyasi partiyanın qeydiyyatı üçün azı 1000 vətəndaş onun üzvü olmalıdır. Hazırda 58 siyasi partiyanın dövlət qeydiyyatı var.
Qubad İbadoğlu 1971-ci il sentyabrın 12-də Füzuli rayonunun Aşağı Güzlək kəndində doğulub. Azərbaycan Dövlət İqtisad Universitetini və həmin təhsil ocağının aspiranturasını bitirib. İqtisad elmləri namizədidir. Azərbaycan Dövlət İqtisad Universitetində və dünyanın bir çox ölkəsinin ali məktəbində dərs deyib, hazırda London İqtisadiyyat Məktəbinin professorudur.
Uzun illər Müsavat Partiyasının rəhbərliyində təmsil olunub.
