Müavin birinci müavin oldu
Prezident İlham Əliyev Rövşən Nəcəfi iqtisadiyyat nazirinin birinci müavini təyin edib. Xəbəri Report.az dekabrın 24-də yayıb.
1982-ci il təvəllüdlü Rövşən Nəcəf 2020-ci il fevralın 11-dən iqtisadiyyat nazirinin müavini idi.
Novator.az bildirir ki, Rövşən Nəcəf iqtisadiyyat üzrə fəlsəfə doktorudur.
Azərbaycan Dövlət İqtisad Universitetində laborant, İqtisadi İnkişaf Nazirliyində məsləhətçi, baş məsləhətçi, sektor müdiri, Dövlət Neft Şirkətində iqtisadçı, şöbə rəisi vəzifələrini tutub.
İqtisadi İnkişaf Nazirliyində xarici iqtisadi əlaqələr şöbəsinin müdir müavini, müdiri, nazirin köməkçisi vəzifələrində də çalışan Rövşən Nəcəf həmçinin “Azərbaycan İnvestisiya Şirkəti” ASC-nin icraçı direktorunun müavini, icraçı direktoru olub.
2018-2019-cu illərdə Prezident Administrasiyasının innovativ inkişaf və elektron hökumət məsələləri şöbəsinin müdiri postunda çalışıb.
Maliyyə Monitorinqi Xidmətinin İdarə Heyətinə sədrlik edir.
İqtisadiyyat naziri vəzifəsini Mikayıl Cabbarov tutur.
