Naxçıvanın sosial-iqtisadi göstəriciləri
Naxçıvan Muxtar Respublikasının Dövlət Statistika Komitəsi yeni hesabat yayıb. Rəsmi məlumata görə, 2021-ci ilin yanvar-noyabr aylarında muxtar respublikada 2,6 milyard manatlıq, 2020-ci ilin eyni dövrü ilə müqayisədə 1,4 faiz çox ümumi daxili məhsul istehsal olunub. Hər bir nəfərə düşən ümumi daxili məhsulun həcmi 5693,6 manat göstərilir.
2020-ci ilin 11 ayına nəzərən sənayedə 1,4 faiz, sərmayə qoyuluşunda 1,3 faiz, kənd təsərrüfatında 4 faiz, informasiya və rabitə xidmətlərinin dəyərində 6,8 faiz, kreditlərin həcmində 26 faiz yüksəliş olduğu vurğulanır.
Hesabata əsasən, muxtar respublikada 384 növdə məhsul istehsal olunur, 350 növdə məhsula tələbat tamamilə yerli imkanlar hesabına ödənir.
Noyabrın 1-nə muxtar respublika iqtisadiyyatında bir işçiyə hesablanmış orta aylıq əməkhaqqı 546,8 manat olub.
