İlham Əliyev – 60
Prezident İlham Əliyevin 60 yaşı tamam olur.
Novator.az bildirir ki, 1961-ci il dekabrın 24-ü Bakıda doğulan İlham Əliyev Moskva Dövlət Beynəlxalq Münasibətlər İnstitutunu və həmin təhsil müəssisəsinin aspiranturasını bitirib, orada müəllimlik eləyib.
1991-ci ildən özəl biznes sahəsində çalışan İlham Əliyev 1994-cü ildə Azərbaycan Dövlət Neft Şirkətinin vitse-prezidenti təyin edilib, sonra birinci vitse-prezident olub.
1995 və 2000-ci illərdə Milli Məclisin deputatı seçilib. 2003-cü il avqustun 4-də baş nazir vəzifəsinə təyin edilib.
2003 və 2008-ci illərdə 5 il müddətinə prezident seçilib. 2009-cu ildə bir nəfərin iki dəfədən çox prezident seçilməsi məhdudiyyəti götürülüb və İlham Əliyev 2013-cü ildə də dövlət başçısı postuna mandat alıb.
2016-cı ildə prezidentin səlahiyyət müddəti 7 ilə qaldırılıb, 2018-ci ildə İlham Əliyev yenidən prezident seçilib.
İlham Əliyev 2005-ci ildən Yeni Azərbaycan Partiyasının sədridir.
Onun atası Heydər Əliyev 1969-1982-ci (Azərbaycan Kommunist Partiyası Mərkəzi Komitəsinin birinci katibi) və 1993-2003-cü illərdə (əvvəl Milli Məclisin sədri, sonra prezident) Azərbaycana rəhbərlik edib.
İlham Əliyevin həyat yoldaşı Mehriban Əliyeva ölkənin ikinci ali vəzifəli şəxsi – birinci vitse-prezidentdir.
