Yerevan meriyasında yeni rəhbər
Ermənistan paytaxtında mer dəyişib. Novator.az-ın məlumatına görə, dekabrın 22-də Yerevan Şəhər Şurası Ayk Marutyanı mer postundan uzaqlaşdırıb, həmin vəzifəyə Qraçya Sərkisyanı seçib.
Təşəbbüsü Şəhər Şurasındakı hakim “Mənim addımım” fraksiyası irəli sürüb.
Qraçya Sərkisyan merin birinci müavini idi.
Yerevan Şəhər Şurası proporsional üsulla seçilir. 2018-ci il sentyabrın 23-də keçirilmiş şura seçkisində baş nazir Nikol Paşinyanın dəstəklədiyi “Mənim addımım” bloku 65 mandatın 57-nə sahib çıxıb, blokun namizədlərinin siyahısında birinci olan Ayk Marutyan mer postunu tutmaq hüququ qazanıb.
Ayk Marutyan 2020-ci ilin dekabr ayında “Mənim addımım” fraksiyasını tərk edib və tədricən hakim Vətəndaş Sazişi Partiyası ilə əlaqələri kəsib.
Vətəndaş Sazişi Partiyasının sədri olan Nikol Paşinyan baş nazir postuna 2018-ci il mayın 8-də xalq hərəkatı dalğasında gəlib.
2018-ci il dekabrın 9-da keçirilmiş növbədənkənar parlament seçkisində Nikol Paşinyanın “Mənim addımım” bloku qələbə qazanaraq təkbaşına hökumət qurub.
2021-ci il iyunun 20-də keçirilmiş daha bir növbədənkənar parlament seçkisində Vətəndaş Sazişi Partiyası 107 mandatın 71-ni alaraq hökumət qurmaq hüququ əldə edib.
