11 ayın xarici ticarəti
2021-ci ilin 11 aylıq xarici ticarət göstəriciləri dərc edilib. Novator.az bildirir ki, rəsmi hesabata görə, Dövlət Gömrük Komitəsi yanvar-noyabr aylarında 19,8 milyard dollarlıq ixrac, 10,4 milyard dollarlıq idxal qeydə alıb, 186 ölkə ilə ticarət əməliyyatı aparılıb, gömrük orqanları büdcəyə 3 milyard 937,5 milyon manat vəsait ödəyib.
Məlumata əsasən, ixracın 8,3 faizi MDB ölkələrinin, 58,1 faizi Avropa İttifaqı ölkələrinin, 33,6 faizi başqa ölkələrin payına düşüb.
İdxalda MDB-nin payı 25 faiz, Avropa İttifaqının payı 18,5 faiz, başqa ölkələrin payı 56,5 faizdir.
Yanvar-noyabr aylarında əsas tərəfdaş İtaliya olub, bu ölkə ilə ticarət ümumi dövriyyənin 28,2 faizi həcmində rəsmiləşib. İxracda əsas ölkə İtaliya (ümumi ixracın 41,2 faizi), idxalda Rusiyadır (17,8 faiz).
Statistikaya görə, ixracın 88,1 faizi neft-qaz sektoruna daxil olan mallardır, idxalda ən böyük pay maşın, mexanizm, elektrik avadanlıqları və onların hissələrinə düşür: 23,8 faiz.
