107 hakimin 3-ü qıraqda qaldı
Məhkəmə-Hüquq Şurasının 20 dekabr iclasında 2018-ci ildə hakim təyin olunmuş, səlahiyyət müddətləri başa çatan 107 nəfər barədə rəy, sənəd və digər materialların toplandığı, onların fəaliyyətinin qiymətləndirildiyi bildirilib. Rəsmi məlumata görə, onların əksəriyyəti hakimliyə yararlı hesab edilib, 3 nəfərin səlahiyyətlərinə xitam verilməsi, 8 nəfərin apellyasiya məhkəmələrinə irəli çəkilməsi, digərlərinin birinci instansiya məhkəmələrinin hakimi vəzifələrinə təyin edilməsi məqsədəuyğun sayılıb. Təyinat təklifləri hazırlanaraq dövlət başçısına təqdim olunub, dekabrın 21-də təyinatlar aparılıb.
2005-ci ildə fəaliyyətə başlayan Məhkəmə-Hüquq Şurasının hakim vəzifələrinə seçkinin təşkili, hakimlərin fəaliyyətini qiymətləndirmək, onları intizam məsuliyyətinə cəlb etmək, hakimlərin iş yerinin dəyişdirilməsi, vəzifədə irəli çəkilməsi təqdimatları vermək səlahiyyətləri var. Şuraya ədliyyə naziri Fikrət Məmmədov sədrlik edir.
