Yerevan meri yola salınır
Ermənistanın paytaxtında mer dəyişir. Novator.az-ın məlumatına görə, dekabrın 16-da axşam Yerevan Şəhər Şurasındakı hakim “Mənim addımım” fraksiyası Ayk Marutyanın Qraçya Sərkisyanla əvəzlənməsi təşəbbüsü qaldırıb. Qraçya Sərkisyan hazırda merin birinci müavinidir.
Proporsional üsulla seçilən Yerevan Şəhər Şurası 65 nəfərdən ibarətdir. 2018-ci il sentyabrın 23-də keçirilmiş şura seçkisində baş nazir Nikol Paşinyanın dəstəklədiyi “Mənim addımım” bloku 57 mandatla birinci olub. Mandatların yarıdan çoxunu əldə etdiyi üçün “Mənim addımım” blokunun namizədlərinin siyahısında birinci olan Ayk Marutyan Yerevan meri postunu tutmaq hüququ qazanıb.
1976-cı il təvəllüdlü Ayk Marutyan 2020-ci ilin dekabr ayında “Mənim addımım” fraksiyasını tərk edib və tədricən hakim Vətəndaş Sazişi Partiyası ilə əlaqələri kəsib.
Vətəndaş Sazişi Partiyasının sədri olan Nikol Paşinyan baş nazir postuna 2018-ci il mayın 8-də xalq hərəkatı dalğasında gəlib.
2018-ci il dekabrın 9-da keçirilmiş növbədənkənar parlament seçkisində Nikol Paşinyanın “Mənim addımım” bloku qələbə qazanaraq təkbaşına hökumət qurub.
2021-ci il iyunun 20-də keçirilmiş daha bir növbədənkənar parlament seçkisində Vətəndaş Sazişi Partiyası 107 mandatın 71-ni alaraq hökumət qurmaq hüququ əldə edib.
