Uyğurları müdafiə qanunu Senatdan da keçdi
Dekabrın 16-da ABŞ Konqresinin yuxarı palatası – Senat Çində uyğurların məcburi əməyə cəlb olunmasının qarşısını almağa yönəlmiş qanunu təsdiqləyib.
Novator.az xəbər verir ki, dekabrın 14-də Konqresin aşağı palatasında (Nümayəndələr Palatası) olduğu kimi Senatda da qanun yekdilliklə dəstəklənib.
Qalır prezident Cozef Baydenin qanunu imzalaması. Hələ Senatdakı səsvermədən əvvəl Ağ evin mətbuat katibi bəyan edib ki, prezident belə bir qanunun qəbulunu alğışlayır və onu hökmən rəsmiləşdirəcək.
Çində uyğurların məcburi əməyə cəlb olunması yolu ilə istehsal edilən məhsullara qadağa qoyan yeni qanunun tələbinə görə, Amerika şirkətləri xaricdən aldıqları malların qul əməyi ilə hazırlanmadığına dair sübut təqdim etməlidir.
Qanun Amerika şirkətlərinin nəinki tam, qismən məcburi əməkdən istifadə olunmaqla hazırlanmış məhsullar almasını da yasaqlayır.
Hesab edilir ki, ABŞ şirkətləri qarşısında belə bir tələbin irəli sürülməsi uyğurları əsir düşərgələrində qul kimi işlədən və ixrac etdiyi mallarla bağlı standartların sərtləşdirilməsindən çəkinən Çinin iqtisadiyyatına ciddi ziyan vuracaq.
Uyğurlar əsasən Çinin şimal-qərbində yerləşən Sincan Uyğur Muxtar Rayonunda yaşayırlar. Burada milyon yarımdan çox uyğur əsir düşərgələrində saxlanır.
Beynəlxalq qurumların hesabatlarına əsasən, Çində milyonlarla uyğur məcburi əməyə, işgəncəyə və cinsi zorakılığa məruz qalır, hökumət uyğurların kökünü kəsmək üçün qadınların uşaq dünyaya gətirməsinə də maneələr törədir.
Dünyanın bir sıra demokratik dövlətləri, o cümlədən ABŞ uyğurlara qarşı hərəkətləri soyqırımına cəhd kimi qiymətləndirir.
Mənbə: Nbcnews.com
