Maaşlara artım gəlir
Dekabrın 17-də prezident İlham Əliyev sərəncam imzalayıb. Sənədə görə, 2022-ci il yanvarın 1-dən büdcədən maliyyələşən dövlət ümumi təhsil müəssisələrində çalışan, bilik və bacarıqlarının diaqnostik qiymətləndirilməsi aparılmış müəllimlərin, həmin müəssisələrin direktor və direktor müavinlərinin aylıq vəzifə maaşları orta hesabla 20 faiz, gənclərin çağırışaqədər hazırlıq rəhbərlərinin aylıq vəzifə maaşları orta hesabla 40 faiz artırılır.
Dövlət Statistika Komitəsi 2021-ci il noyabrın 1-nə muzdla çalışan işçilərin orta aylıq nominal əməkhaqqını 722,9 manat göstərib. Novator.az bildirir ki, təhsil sahəsində orta maaş 522,8 manat olub.
Dekabrın 17-də verilən başqa sərəncamla minimum aylıq əməkhaqqının məbləği 2022-ci il yanvarın 1-dən 300 manat müəyyən edilir. Hazırda minimum maaş 250 manatdır.
Eyni vaxtdan büdcədən maliyyələşən dövlət peşə təhsili müəssisələrində çalışan, bilik və bacarıqlarının diaqnostik qiymətləndirilməsi aparılmış müəllimlərin, idarəetmə və təlim fəaliyyəti ilə məşğul olan işçilərin aylıq vəzifə maaşları orta hesabla 20 faiz, fiziki tərbiyə rəhbərlərinin aylıq vəzifə maaşları orta hesabla 30 faiz, gənclərin çağırışaqədər hazırlıq rəhbərlərinin aylıq vəzifə maaşları orta hesabla 40 faiz artırılır.
Digər sərəncam dövlət büdcəsindən maliyyələşən bəzi təşkilatlarda çalışan rəhbər və digər işçilərin aylıq vəzifə maaşlarının 2022-ci il yanvarın 1-dən orta hesabla 20 faiz artırılmasını nəzərdə tutur.
