Yeni görüş, yeni ümidlər
AZƏRTAC-ın məlumatına görə, dekabrın 15-i axşam Avropa İttifaqının baş şəhəri Brüsseldə prezident İlham Əliyevlə Ermənistanın baş naziri Nikol Paşinyan arasında qeyri-formal görüş keçirilib. Təşəbbüsün Fransa prezidenti Emmanuel Makrondan gəldiyi bildirilir.
Həmin gün Avropa İttifaqının Şərq tərəfdaşlığı sammitində çıxış edən İlham Əliyev Ermənistanın baş naziri ilə 14 dekabr müzakirələrinin konstruktiv mühitdə keçdiyini, Ermənistanla Azərbaycan arasında münasibətlərin normallaşması, sərhədlərin delimitasiyası və demarkasiyası, nəqliyyat infrastrukturunun, xüsusilə də dəmir yolu xəttinin çəkilməsi kimi məsələlərin müzakirə olunduğunu diqqətə çatdırıb.
Prezident Şərq tərəfdaşlığının sammitində Ermənistanla Azərbaycan arasında konstruktiv mühitin hökm sürdüyünü qeyd edib, bu imkanın əldən verilməməsinin, regionda davamlı sülhün təmin olunması istiqamətində səylərin davam etdirilməsinin vacibliyini vurğulayıb.
Dövlət başçısı ATƏT-in Minsk qrupunun roluna toxunaraq 28 il aparılmış danışıqlarda hər hansı bir nəticənin hasil olmadığını diqqətə çatdırıb, Azərbaycanın Minsk qrupundan yeni geosiyasi reallığa uyğun cavab gözlədiyini bildirib, deyib ki, Minsk qrupu Ermənistanla Azərbaycan arasında sülh sazişinin hazırlanması, sərhədlərin delimitasiyası, insanlar arasında təmasların yaradılması, etimad quruculuğu tədbirləri və digər məsələlərdə kömək göstərə bilər.
