Cəbhəçinin işi Bakı Apellyasiya Məhkəməsinə qaytarıldı
Dekabrın 16-da Ali Məhkəmə AXCP üzvü Paşa Umudovun şikayəti üzrə qərar çıxarıb. Cəbhəçi məhkəməyə bəraət istəyi ilə üz tutmuşdu.
2019-cu il oktyabrın 15-i Bakıda tutulan Paşa Umudov Nərimanov Rayon Məhkəməsinin 7 avqust 2020-ci il hökmü ilə 4 il 6 ay müddətinə azadlıqdan məhrum edilib. Cəbhəçi satış məqsədi ilə qanunsuz olaraq narkotik vasitə saxlamada təqsirli bilinib. Paşa Umudov ittihamı saxta adlandırır, siyasi fəaliyyətinə görə şərləndiyini deyir.
Bakı Apellyasiya Məhkəməsi 2020-ci il oktyabrın 27-də Paşa Umudovun cəzasını qüvvədə saxlayıb. “Turan”ın məlumatına görə, 2021-ci il dekabrın 16-da Ali Məhkəmə işin Bakı Apellyasiya Məhkəməsinə qaytarılması barədə qərar çıxarıb.
Novator.az bildirir ki, hazırda daha 4 AXCP üzvü azadlıqdan məhrumetmə cəzası çəkir.
2018-ci il mayın 25-də tutulan Aqil Məhərrəmov xüsusilə külli miqdarda gəlir əldə etməklə qanunsuz sahibkarlıqda və mütəşəkkil dəstənin cinayət yolu ilə əldə edilmiş külli miqdarda pul vəsaitlərini leqallaşdırmasında təqsirli bilinərək 4 il müddətinə azadlıqdan məhrum olunub.
2020-ci il aprelin 16-sı tutularaq 30 sutka inzibati həbs verilən, sonra cinayət məsuliyyətinə cəlb olunaraq barəsində həbs qətimkan tədbiri seçilən Niyaməddin Əhmədov 13 il müddətinə azadlıqdan məhrum edilib. O, terrorçuluğu maliyyələşdirmə; qanunla mülki dövriyyədə olmasına yol verilməyən (mülki dövriyyədən çıxarılmış) əşyaları qanunsuz olaraq hazırlama, əldə etmə, saxlama, daşıma, gəzdirmə, başqasına vermə və ya satma; dövlət əleyhinə yönələn açıq çağırışlar etməyə hazırlıqda təqsirli bilinib.
Zamin Salayev 2020-ci il aprelin 20-də böhtan və təhqirdə təqsirli bilinərək 2 il 3 ay müddətinə azadlıqdan məhrum edilib. 2021-ci il noyabrın 5-də Milli Məclisin verdiyi amnistiya qərarı ilə onun cəzası 6 ay azaldılıb.
2021-ci il avqustun 11-də tutulan Aqil Hümmətov ümumi təhlükəli üsulla, xuliqanlıq niyyəti ilə qəsdən sağlamlığa ağır zərər vurma ittihamı ilə 10 il müddətinə azadlıqdan məhrumetmə cəzası alıb.
