Avropa Məhkəməsindən Azərbaycan qərarları
Dekabrın 16-da Avropa İnsan Hüquqları Məhkəməsi Azərbaycandan şikayətlər üzrə qərarlar elan edib.
İcazəsiz sayılan kütləvi aksiyada iştiraka görə inzibati həbs cəzaları almış Tariyel Şirinli və Heybət Əmrah Avropa İnsan Hüquqları Konvensiyası ilə tanınan azadlıq və toxunulmazlıq, ədalətli məhkəmə araşdırması hüquqlarına müdaxilədən şikayətləniblər. Azərbaycan dövləti ərizəçilərə təzminat ödəməyə razılaşıb. Avropa Məhkəməsinin qərarına əsasən, Tariyel Şirinliyə 3500, Heybət Əmraha 6500 avro təzminat ödənməlidir.
Mirzəbəyov və başqaları şikayətlərində mülkiyyət hüququna müdaxilə məsələsini qaldırıblar. Dövlətlə anlaşmanın şərtlərinə görə, Fevral Mirzəbəyov və Telman Abbasov 3850, Mehman Məmmədov və Mehman Malikov 1750 avro təzminat alacaqlar.
Xəbəri Aihmaz.org yayıb.
Fransanın Strasburq şəhərində yerləşən, hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarət edir.
Azərbaycan 1949-cu ildə yaradılmış Avropa Şurasına 2001-ci ildə qoşulub, 2002-ci ildən Avropa Məhkəməsinin yurisdiksiyasındadır.
