Yenə köhnə “yox”

15 Dekabr 2021
comments
hikmet
Posted in Aktual Manşet Xəbər

Bakı Ağır Cinayətlər Məhkəməsində mühakimə olunan dövlət xadimi Eldar Həsənov 13 dekabr prosesində deyib ki, səhhəti təhlükəli həddədir, hətta hakimlərin özlərinin müəyyənləşdirdiyi istənilən həkimin onu müayinə etməsinə razıdır. Meydan.tv-nin məlumatına görə. Eldar Həsənov dekabrın 10-da Dövlət Təhlükəsizliyi Xidmətinin istintaq təcridxanasında rəsmi şəxslərin, o cümlədən həkimin, vəkilinin iştirakı ilə müzakirələr aparıldığını qeyd edib: “Həmçinin səhhətim müzakirə olundu. Dərmanların çoxluğu dəhşətli fəsadlar verir. Bu baxımdan sizdən xahiş edirəm özünüzün tanıdığınız, bildiyiniz bir həkim verin, dərmanlarımın sayının azalmasına kömək eləsin”.

Eldar Həsənovun sözlərinə görə, Dövlət Təhlükəsizliyi Xidmətinin Hərbi Hospitalında müalicə alarkən baş həkim konsiliumda təlimat verib ki, dərmanların sayı azaldılsın, dərmanlar çoxdur, bu da orqanizmdə əlavə fəsadlar yaradır: “Konsiliumda iştirak edən həkimlər kollegial olaraq mənə bildirdilər ki, dərmanlarımın sayını azaltmaq məsələsində məsuliyyəti heç bir həkim üzərinə götürmür. Bu gün qəbul etdiyim dərmanların sayı 31-ə çatıb. Məhkəmədə tibbi sənədlər var, 3 ay 8 gündür mənim nəbzimi 100-dən aşağı sala bilmirlər. Bəzən 128-ə qədər qalxır. Mənim yaşımda üç aydan artıq nəbzin 100-dən aşağı düşməməsi ağır nəticələrə gətirib çıxara bilər. Mən xroniki ürək xəstəliyinə görə dəfələrlə əməliyyat keçirmişəm. Təcridxanada bir həkim, bir tibb bacısı var. Məsuliyyətli, vicdanlı insanlardır. 7 gündür ki, dəhşətli ürək sancmalarından əziyyət çəkirəm. Möhtərəm hakim, özünüzü həm insanların, həm də Allahın qarşısında bu günahlara batırmayın. Kimi məsləhət bilirsinizsə, onun iştirakı ilə müayinə olunmağıma icazə verin. Müdafiəçilərimin təqdim etdiyi çoxsaylı həkimlərin heç birinə icazə vermədiniz. Kimi məsləhət bilirsinizsə, bildirin, dərmanların sayının azaldılmasında və nəbzin aşağı salınmasında gəlib mənə kömək eləsin, ürək sancıları səngisin. Başqa xəstəliklərim haqda danışmaq istəmirəm”.

Eldar Həsənov əlavə edib ki, əcnəbi həkimləri onun hazırkı durumunda yardım edə bilmək üçün müayinələrin nəticələrini istəyiblər, lakin laboratoriya analizləri üçün də məhkəmənin razılıq məktubu olmalıdır: “Mən 20 il müayinə olunduğum xəstəxananın Türkiyə və İsveçrədən olan həkimlərinin tövsiyəsi ilə analizlər verməliyəm. Dövlət Təhlükəsizliyi Xidmətinin hospitalının laboratoriyası o analizləri götürmək imkanına malik deyil. Bakıda bir neçə laboratoriya var ki, orada həmin analizlər götürülür. Dərmanların sayının azaldılması üçün analizlər zəruridir. Birmənalı dedilər ki, hakimin məktubu kifayətdir, onun əsasında laboratoriya analizləri məsələsini həll edə bilərik. Mən obyektiv həqiqəti çatdırıram, qalanını sizin özünüzə buraxıram. Hər şey qeyd olunur, tarix bilər, siz bilərsiz”.

Əfqan Hacıyevin sədrlik etdiyi hakimlər kollegiyası Eldar Həsənova həkimlərlə bağlı məsələdə yenə “yox” deyib.

Noyabrda vəkillər Eldar Həsənovu tibb elmləri doktoru, professor Adil Qeybullanın, dekabrda etibar etdiyi əcnəbi həkimin müayinə etməsinə icazə verilməsini istəyiblər. Vəsatətlər təmin edilməyib. Bildirilib ki, Eldar Həsənovun saxlandığı Dövlət Təhlükəsizliyi Xidmətinin istintaq təcridxanasında həkim və tibbi avadanlıq var.

Eldar Həsənov 1955-ci il oktyabrın 10-da Kəlbəcərin Laçın kəndində doğulub. Bakıda indiki Azərbaycan Texniki Universitetini elektronika mühəndisi ixtisası, Moskvada SSRİ Daxili İşlər Nazirliyinin Akademiyasını hüquqşünas ixtisası ilə bitirib.

1977-ci ildən Azərbaycanın Daxili İşlər Nazirliyi sistemində çalışıb, müfəttiş, baş müfəttiş, cinayət-axtarış şöbəsinin rəis müavini, rəisi postlarını tutub, Bakının Nizami rayonunun, Gəncə şəhərinin milis rəisi, İnterpolun Milli Mərkəzi Bürosunun rəisi, daxili işlər nazirinin birinci müavini olub.

1993-1995-ci illərdə baş prokurorun birinci müavini, 1995-2000-ci illərdə baş prokuror vəzifəsində xidmət edib. Ədliyyə general-leytenantıdır.

2001-ci il martın 28-dən Eldar Həsənov Azərbaycanın Rumıniyada fövqəladə və səlahiyyətli səfiri olub, 2009-cu il sentyabrın 14-dən ölkəni həmçinin Serbiyada, 2010-cu il iyulun 28-dən eyni zamanda Monteneqroda, həmin il avqustun 31-dən həmçinin Bosniya və Herseqovinada təmsil edib. 2013-cü il martın 28-də onun Rumıniyadakı təmsilçiliyinə xitam verilib.

2020-ci il avqustun 13-ü Bakıda tutulan, avqustun 17-də səfir postundan çıxarılan Eldar Həsənova maliyyə pozuntularına yol verilməsi, dövlətə külli miqdarda ziyan vurulması üzrə ittihamlar irəli sürülüb. Eldar Həsənov ittihamları rədd edir.

Həbs olunduğu gündən Dövlət Təhlükəsizliyi Xidmətinin istintaq təcridxanasında saxlanan Eldar Həsənov Bakı Ağır Cinayətlər Məhkəməsində 2021-ci il sentyabrın 3-dən mühakimə olunur.

Prosesə məhkəmə sədrinin müavini Əfqan Hacıyev sədrlik edir, hakimlər kollegiyasına Əhməd Quliyev və Zeynal Ağayev də daxildir.

Səhhəti ağır olan Eldar Həsənov 2021-ci ildə üç dəfə (iyul, avqust, oktyabr aylarında) Dövlət Təhlükəsizliyi Xidmətinin Hərbi Hospitalında müalicə alıb.

Eldar Həsənov hüquq elmləri doktoru, professordur. Gəncə Pedaqoji Universitetinin müəllimi, Azərbaycan Pedaqoji Universitetinin dosenti olub.

Mütəşəkkil cinayətkarlıq, xüsusilə terrorizm və narkotik vasitələrin qanunsuz dövriyyəsinə dair və digər mövzularda Azərbaycan, Türkiyə, Rusiya, Gürcüstan, Almaniya, Rumıniya, Makedoniya, Ukrayna, Serbiya, Monteneqroda nəşr olunmuş kitabların, dərslik və dərs vəsaitlərinin, elmi və publisistik əsərlərin müəllifidir.

About author

Son materiallar

Tags

Rəylər

Do not miss

Son materiallar