Azərbaycanda və başqa ölkələrdə idxal rüsumu
İqtisadçı Rövşən Ağayev Azərbaycanda idxal rüsumlarının orta dərəcəsinin 9,2% olduğunu yazır: “Bu göstərici aqrar mənşəli məhsullar üzrə 11,1%, qeyri-aqrar əmtəələr üzrə 8,9%-dir”.
Novator.az-ın məlumatına görə, Dünya Ticarət Təşkilatının son tarif hesabatına nəzər salan ekspert qeyd edir ki, idxal rüsumunun orta dərəcəsi ilə ölkələrin inkişaf səviyyəsi arasında əlaqə var: “İnkişaf səviyyəsi yüksək olan və ya davamlı iqtisadi inkişafı hədəfləyən, dünya iqtisadiyyatına bazar qaydaları və sağlam rəqabət əsasında inteqrasiyaya çalışan ölkələrdə orta tarif dərəcəsi daha aşağıdır.
Dünya Ticarət Təşkilatı idxal rüsumunun orta dərəcəsini İsveçrə və Gürcüstanda 1,7%, Norveçdə 2,3%, ABŞ və Avstraliyada 2,5%, Avropa İttifaqı məkanında 2,9%, İsraildə 3,1%, Ukraynada 3,2%, Çində 3,4%, Türkiyədə 4,7%, Qazaxıstanda 4,8%, Rusiyada 5,5%, Ermənistanda 5,7%, Pakistanda 9,6%, Qana və Nigerdə 11%, Misirdə 12,4%, İranda 13%, Syerra-Leonede 13,2%, Uqandada 13,6%, Ficidə 14,9%, Zimbabvedə 67,7% göstərir.
Rəqabətli iqtisadiyyat yarada bilməyən, büdcəsini idxal mallarının gömrük yığımları hesabına doldurmağa çalışan ölkələrin yüksək gömrük tarifləri üçün ən populyar arqumenti budur: daxili bazarımızı və yerli sahibkarımızı qoruyuruq. Sanki o birilərinin daxili bazarı və milli sahibkarı yoxdur”.
