Vergi daxilolmaları 15,7 faiz artıb
2021-ci ilin yanvar-noyabr aylarında İqtisadiyyat Nazirliyi yanında Dövlət Vergi Xidmətinin xətti ilə büdcəyə 7 milyard 961,8 milyon manat vergi daxil olub. Rəsmi hesabata görə, ötən ilin 11 ayı ilə müqayisədə vergi daxilolmaları 15,7 faiz artıb.
Qeyd olunur ki, ödənən vergilərin 73,7 faizi qeyri-neft-qaz sektorunun, 26,3 faizi neft-qaz sektorunun payına düşüb.
Açıqlamaya əsasən, məcburi dövlət sosial sığorta haqları üzrə daxilolmalar ötən ilin yanvar-noyabr ayları ilə müqayisədə 8 faiz artaraq 3 milyard 433,1 milyon manat olub.
Dekabrın 1-nə aktiv vergi ödəyicilərinin sayı 660838 göstərilir.
