Ələkdən keçənlər
UEFA-nın iki klub turnirində – Çempionlar Liqası, Avropa Liqası 2021-2022 mövsümünün qrup mərhələsi başa çatıb. Konfrans Liqasında nöqtə G qrupunda təxirə salınmış bir oyunla qoyulacaq.
Novator.az bildirir ki, ümumilikdə üç turnirdə 22 UEFA üzvünün 65 komandası qalır.
2022-ci ilin fevralında başlayacaq növbəti raundlara Azərbaycan UEFA-nın klub reytinqində 26-cı pillədə gedir. Rusiya 9-cu, Ukrayna 12-ci, Türkiyə 15-ci, Qazaxıstan 29-cu, Belarus 32-ci, Moldova 33-cü, Litva 34-cü, Latviya 38-ci, Ermənistan 41-ci, Estoniya 45-ci, Gürcüstan 47-ci pillədə qərar tutub.
55 üzvü olan UEFA-nın klub reytinqi turnirlərdə son beş mövsümdə qazanılan əmsala əsaslanır. Təsnifat mərhələlərində qələbə 1 xal, heç-heçə yarım xal, qrup mərhələsində, 1/8 final, 1/4 final, yarımfinal və finalda qələbə 2 xal, heç-heçə 1 xaldır.
Çempionlar Liqasının qrup mərhələsi 4 bonus xalı, 1/8 finalı 5 bonus xalı, 1/4 finalı, yarımfinalı və finalı 1 bonus xalı verir.
Avropa Liqasında qrup qalibi olmağa 4 bonus xalı, qrupda ikinci yeri tutmağa 2 bonus xalı, 1/8 finala, 1/4 finala, yarımfinala və finala adlamağa 1 bonus xalı düşür.
Konfrans Liqasında qrup qalibi olmaq 2 bonus xalı, qrupda ikinci yeri tutmaq 1 bonus xalı, yarımfinal və final 1 bonus xalı qazandırır.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
Bu mövsüm Azərbaycan 4,375 əmsal əldə edib. Ümumi əmsal 17,000-dir.
