Rövşən Hacıbəyliyə 1500 avro ödənəcək
Avropa İnsan Hüquqları Məhkəməsi dekabrın 9-da jurnalist Rövşən Hacıbəylinin şikayəti üzrə qərar elan edib. Qərara görə, Azərbaycan dövləti Avropa İnsan Hüquqları Konvensiyası ilə verilmiş ifadə azadlığı və ədalətli məhkəmə araşdırması hüquqları pozulan ərizəçiyə 1500 avro təzminat ödəməlidir.
Novator.az bildirir ki, 2012-2013-cü illərdə göndərilmiş şikayətdə Rövşən Hacıbəyli “Azadlıq” qəzetinin redaktoru kimi Səhiyyə Nazirliyinə və Nazirlər Kabinetinə qarşı məhkəmə davası açdığını qeyd edib. Jurnalist Qəbələ Radiolokasiya Stansiyasının ətraf mühitə təsiri ilə bağlı hesabatlar əldə etmək istəyib, dövlət qurumları sorğuları cavabsız qoyub, yerli məhkəmələr isə bu müstəvidə şikayətləri təmin etməyib.
Fransanın Strasburq şəhərində yerləşən, hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarət edir.
Azərbaycan 1949-cu ildə yaradılmış Avropa Şurasına 2001-ci ildə qoşulub, 2002-ci ildən Avropa Məhkəməsinin yurisdiksiyasındadır.
1961-ci il təvəllüdlü Rövşən Hacıbəyli Bakı Dövlət Universitetinin jurnalistika fakültəsinin məzunudur. Jurnalist fəaliyyətinə Azərbaycan Xalq Cəbhəsinin İnformasiya Mərkəzində başlayıb. 1992-ci ildən “Azadlıq” qəzetində çalışıb. Məsul katibin müavini, informasiya şöbəsinin müdiri, məsul katib, redaktor müavini, baş redaktor, redaktor postlarını tutub.
1989-cu ildə yaradılan “Azadlıq” qəzeti 2016-cı ildən nəşr olunmur. Rövşən Hacıbəyli hazırda qəzetin elektron versiyasının – Azadliq.info saytının redaktorudur.
1984-cü ildə SSRİ-nin raket əleyhinə müdafiə sistemi kimi inşa edilmiş Qəbələ Radiolokasiya Stansiyası 2012-ci ilin sonunadək Rusiyanın icarəsində olub. Həmin il dekabrın 10-da istismarı dayandırılan stansiya 2013-cü ilin yayında Azərbaycan hökumətinə təhvil verilib.
