MDB-nin 30 yaşı
Dekabrın 8-də Müstəqil Dövlətlər Birliyinin (MDB) 30 yaşı tamam olur. Novator.az bildirir ki, MDB 1922-ci ildə yaradılan, 1991-ci ildə çökən Sovet Sosialist Respublikaları İttifaqının (SSRİ) qalıqları üzərində qurulub. Dağılarkən SSRİ-yə 15 respublika daxil idi: Estoniya, Latviya, Litva, Belarus, Moldova, Ukrayna, Rusiya, Gürcüstan, Ermənistan, Azərbaycan, Qazaxıstan, Özbəkistan, Türkmənistan, Qırğızıstan, Tacikistan.
MDB-nin əsası Rusiya, Belarus və Ukrayna dövlət başçılarının 8 dekabr 1991-ci ildə Belarusda imzaladığı sazişlə qoyulub.
1991-ci il dekabrın 20-də Azərbaycan Ali Sovetinin Milli Şurası ölkənin Müstəqil Dövlətlər Birliyinə qoşulmasını məqsədəuyğun saymayan qərar qəbul edib.
21 dekabr 1991-ci ildə Almatıda (Qazaxıstan) Moldova, Azərbaycan, Ermənistan, Qazaxıstan, Özbəkistan, Türkmənistan, Qırğızıstan, Tacikistan 8 dekabr sazişini imzalayaraq MDB-yə qoşulublar, bu ölkələrin, eləcə də Rusiya, Ukrayna, Belarusun dövlət başçıları MDB-ni rəsmiləşdirən birgə bəyannamə qəbul ediblər.
7 oktyabr 1992-ci ildə Milli Məclis 1991-ci il dekabrın 21-də Almatıda Azərbaycan Respublikası adından imzalanmış Müstəqil Dövlətlər Birliyi haqqında sazişi təsdiqləməyib.
22 yanvar 1993-cü ildə Minskdə (Belarus) MDB-nin nizamnaməsi qəbul olunub. Sənəd Ukrayna və Türkmənistanda ratifikasiya olunmayıb, həmin vaxtdan bu iki dövlət MDB-nin üzvləri yox, təsisçiləri və iştirakçıları sayılıb.
20 sentyabr 1993-cü ildə Azərbaycan Milli Məclisi ölkənin Müstəqil Dövlətlər Birliyinə qoşulması barədə qərar çıxarıb. Sentyabrın 24-də məsələ həllini tapıb.
1993-cü il dekabrın 9-da Gürcüstan da MDB-yə qoşulub.
Rusiyanın hərbi-siyasi təcavüzünə məruz qalan Gürcüstan 18 avqust 2008-ci ildə MDB-dən çıxmaq barədə nota verib. Təşkilatın nizamnaməsinə uyğun olaraq bir il sonra – 18 avqust 2009-cu ildə Gürcüstanın MDB-dən ayrılması rəsmiləşib.
Rusiyanın hərbi-siyasi təcavüzü ilə üzləşən Ukrayna 2014-cü ildən başlayaraq MDB-nin tədbirlərini boykot edir və qurumdan ayrılmaq istiqamətində rəsmi qərarlar çıxarır…
MDB-nin icra orqanı Minskdə yerləşir. İcraiyyə Komitəsinin sədri-icraçı katib postunu rusiyalı Sergey Lebedev tutur.
