Ermənistanda yerli seçkilər
Ermənistanda dekabrın 5-də keçirilmiş yerli seçkilərin ilkin nəticələri açıqlanıb. Novator.az bildirir ki, 9 vilayətin 36 yaşayış məntəqəsini əhatə edən seçkilərə ölkə və yerli miqyaslı 130 partiya və blok, 4,2 minə yaxın namizəd qatılıb.
Mərkəzi Seçki Komissiyası hakim Vətəndaş Sazişi Partiyasının ümumilikdə 50 faizdən çox səs topladığını, 36 yerli məclisin 16-da qalib gəldiyini bəyan edib.
Vətəndaş Sazişi Partiyasına baş nazir Nikol Paşinyan sədrlik edir. O, baş nazir postuna 2018-ci il mayın 8-də xalq hərəkatı dalğasında gəlib.
2018-ci il dekabrın 9-da keçirilmiş növbədənkənar parlament seçkisində Nikol Paşinyanın “Mənim addımım” bloku qələbə qazanaraq təkbaşına hökumət qurub.
2021-ci il aprelin 25-də Nikol Paşinyan və hökuməti növbədənkənar parlament seçkisi naminə istefaya gedib. Mayın 10-da qanunverici orqan buraxılıb, iyunun 20-nə növbədənkənar parlament seçkisi təyin olunub. 20 iyun seçkisində Vətəndaş Sazişi Partiyası 107 nəfərlik parlamentə 71 deputat yeri qazanaraq hökumət qurmaq hüququ əldə edib.
Avqustun 2-də yeni parlament fəaliyyətə başlayıb, həmin gün Nikol Paşinyan baş nazir postuna təyinat alıb.
