Eldar Həsənovun istəyi

06 Dekabr 2021
comments
hikmet
Posted in Aktual Manşet Xəbər

Dövlət xadimi Eldar Həsənov 2021-ci il sentyabrın 3-dən Bakı Ağır Cinayətlər Məhkəməsində mühakimə olunur. Prosesə Əfqan Hacıyev sədrlik edir, hakimlər kollegiyasına Əhməd Quliyev və Zeynal Ağayev də daxildir.

1957-ci il təvəllüdlü Əfqan Hacıyev Vəkillər Kollegiyasının Rəyasət Heyətində kuryer, katib postlarını tutub, Bakıda vəkillik fəaliyyəti göstərib, Ağır Cinayətlərə Dair İşlər üzrə Məhkəmənin hakimi olub. 2011-ci ildən Bakı Ağır Cinayətlər Məhkəməsinin hakimi, 2018-ci ildən məhkəmə sədrinin müavinidir.

Meydan.tv-nin məlumatına görə, dekabrın 3-də keçirilən məhkəmə prosesində vəkillər Eldar Həsənovun səhhətində ciddi problemlər olduğunu vurğulayaraq etibar etdiyi həkimin onu müayinə və müalicə etməsinə icazə verilməsini istəyiblər. Vəsatətdə əcnəbi həkimin müayinəyə buraxılması istəyi yer alıb.

Hakimlər vəsatəti təmin etməyib. Bildirilib ki, Eldar Həsənovun saxlandığı Dövlət Təhlükəsizliyi Xidmətinin istintaq təcridxanasında həkim və tibbi avadanlıq var.

Bundan sonra vəkillər Əfqan Hacıyevə etiraz verib. Vəkil Cavad Cavadov deyib ki, məhkəmə Eldar Həsənovun müdafiəsi üçün zəruri olan heç bir vəsatəti təmin etmir: “Müdafiə tərəfinin bütün vəsatətləri rədd edilir. Özü də rədd qərarı əsaslandırılmır. Bəzən vəsatət digər hakimlərlə müzakirəyə də çıxarılmır. Qanuna görə, vəsatətlə bağlı qərar əsaslandırılmalıdır, orada ərizəçinin dəlillərinə verilmiş qiymət əksini tapmalıdır. İşin hərtərəfli, obyektiv araşdırılması, cinayət prosesində iştirak edən şəxslərin pozulmuş hüquqlarının bərpasına yönələn vəsatət və xahişlər rədd edilə bilməz”.

Eldar Həsənov vəkillərinin etirazına belə münasibət bildirib: “Vaxt itkisinə yol vermək lazım deyil. Adım kimi əminəm, bu etiraz da təmin olunmayacaq. Mən istəyirəm vaxt itkisinə yol verilmədən, tezliklə mənim haqqımda hökm çıxarılsın”.

Əfqan Hacıyevə verilmiş etiraza baxan digər iki hakim onun təmin olunmaması qərarı çıxarıb.

3 dekabr prosesində sənədlər elan edilib. Hakim Əfqan Hacıyev deyib ki, xaricdə yaşayan şahidlər məhkəmə prosesinə çağırılıb, onların dekabrın 22-də dindirilməsi gözlənir. Şahidlər arasında Eldar Həsənovun səfir işlədiyi ölkələrdə səfirlik binalarını satmış şəxslərin, həmin əmlakların sahiblərinin və başqalarının olduğu bildirilir.

Eldar Həsənov 1955-ci il oktyabrın 10-da Kəlbəcərin Laçın kəndində doğulub. Bakıda indiki Azərbaycan Texniki Universitetini elektronika mühəndisi ixtisası, Moskvada SSRİ Daxili İşlər Nazirliyinin Akademiyasını hüquqşünas ixtisası ilə bitirib.

1977-ci ildən Azərbaycanın Daxili İşlər Nazirliyi sistemində çalışıb, müfəttiş, baş müfəttiş, cinayət-axtarış şöbəsinin rəis müavini, rəisi postlarını tutub, Bakının Nizami rayonunun, Gəncə şəhərinin milis rəisi, İnterpolun Milli Mərkəzi Bürosunun rəisi, daxili işlər nazirinin birinci müavini olub.

1993-1995-ci illərdə baş prokurorun birinci müavini, 1995-2000-ci illərdə baş prokuror vəzifəsində xidmət edib. Ədliyyə general-leytenantıdır.

2001-ci il martın 28-dən Eldar Həsənov Azərbaycanın Rumıniyada fövqəladə və səlahiyyətli səfiri olub, 2009-cu il sentyabrın 14-dən ölkəni həmçinin Serbiyada, 2010-cu il iyulun 28-dən eyni zamanda Monteneqroda, həmin il avqustun 31-dən həmçinin Bosniya və Herseqovinada təmsil edib. 2013-cü il martın 28-də onun Rumıniyadakı təmsilçiliyinə xitam verilib.

2020-ci il avqustun 13-ü Bakıda tutulan, avqustun 17-də səfir postundan çıxarılan Eldar Həsənova 2010-2020-ci illərdə maliyyə pozuntularına yol verilməsi, dövlətə külli miqdarda ziyan vurulması ittihamları irəli sürülüb. Eldar Həsənov ittihamları rədd edir.

Həbs olunduğu gündən Dövlət Təhlükəsizliyi Xidmətinin istintaq təcridxanasında saxlanan Eldar Həsənov Bakı Ağır Cinayətlər Məhkəməsində 2021-ci il sentyabrın 3-dən mühakimə olunur.

Səhhəti ağır olan Eldar Həsənov 2021-ci ildə üç dəfə (iyul, avqust, oktyabr aylarında) Dövlət Təhlükəsizliyi Xidmətinin Hərbi Hospitalında müalicə alıb.

Eldar Həsənov hüquq elmləri doktoru, professordur. Gəncə Pedaqoji Universitetinin müəllimi, Azərbaycan Pedaqoji Universitetinin dosenti olub.

Mütəşəkkil cinayətkarlıq, xüsusilə terrorizm və narkotik vasitələrin qanunsuz dövriyyəsinə dair və digər mövzularda Azərbaycan, Türkiyə, Rusiya, Gürcüstan, Almaniya, Rumıniya, Makedoniya, Ukrayna, Serbiya, Monteneqroda nəşr olunmuş kitabların, dərslik və dərs vəsaitlərinin, elmi və publisistik əsərlərin müəllifidir.

Eldar Həsənov həmçinin Narkotizm, Alkoqolizm və Digər Asılılıqlar üzrə Beynəlxalq Şuranın və BMT proqramlarının Türkiyə və MDB ölkələri üzrə əlaqələndiricisi olub, Beynəlxalq Hüquqşünaslar Assosiasiyasının (London), İnsan Hüquqları və Demokratiya üzrə Avropa Hüquqşünaslar Assosiasiyasının (Drezden), Beynəlxalq Kriminologiya Cəmiyyətinin (Paris) və bir çox başqa beynəlxalq təşkilatın üzvüdür, Davamlı Sülh və İnkişaf Naminə Beynəlxalq Fond (Sofiya), Beynəlxalq Hüquqşünaslar İttifaqı (Moskva), Cənub-Şərqi Avropada Əməkdaşlıq Təşəbbüsü Təşkilatı və başqa beynəlxalq qurumlarda rəhbər vəzifələr tutur.

Eldar Həsənov Rumıniyanın üç universitetinin fəxri doktorudur, Serbiya Kral Akademiyasında təmsil olunur.

Ailəlidir, iki qızı, bir oğlu, altı nəvəsi var.

Eldar Həsənov

Şikayət verilib

Məhkəmə qərarı dəyişmədi

Eldar Həsənov həbsi barədə nə deyir?

Eldar Həsənovun bir istəyi təmin olundu

Eldar Həsənov xəbəri rəsmən təsdiqləndi

Eldar Həsənovun səhhəti yaxşı deyil

Eldar Həsənovun gündəliyindən

“Mənim düşmənim yoxdur, ermənidən başqa”

Eldar Həsənovu buraxmadılar