Tofiq ziyarəti
Müxalif liderlər və fəallar 1 dekabr aksiyasında tutularaq döyülən siyasətçi Tofiq Yaqubluya baş çəkiblər.
İctimai-siyasi fəalların dekabrın 1-i Bakının Fəvvarələr meydanında məhbus Saleh Rüstəmova azadlıq tələbi ilə keçirmək istədiyi aksiya polis müdaxiləsinə məruz qalıb. Müsavat Partiyasının və Demokratik Qüvvələrin Milli Şurasının üzvü Tofiq Yaqublunun bildirdiyinə görə, tutulub döyülə-döyülə Səbail Rayon Polis İdarəsinin 39-cu bölməsinə aparılıb, orada işgəncəyə məruz qalıb, sonra avtomobillə müxtəlif məkanlara aparılaraq aramsız döyülüb, axırda Ələt qəsəbəsində sərbəst buraxılıb.
Üz-gözündən ağır xəsarətlər alan siyasətçi Bakıdakı evində müalicə olunur.
Novator.az-ın məlumatına görə, AXCP sədri Əli Kərimli yazır ki, dekabrın 2-də müxalif fəallarla birgə Tofiq Yaqublunu yoluxub, Haqq-Ədalət Partiyasının sədri Əli İnsanov da ona baş çəkməyə gəlib: “Tofiq bəy təsəvvür etdiyinizdən də artıq işgəncələrə məruz qalıb. Amma buna baxmayaraq iradəsi möhkəmdir, mübarizə əzmi yerindədir”.
