Avstriya Xalq Partiyasının sədri, ölkənin sabiq hökumət başçısı – kansleri Sebastyan Kurts hakim qurumun rəhbərliyindən ayrıldığını, siyasətdən getdiyini bəyan edib. Novator.az-ın məlumatına görə, dekabrın 2-də açıqlama yayan Sebastyan Kurts qeyd edib ki, ailəsi, bu yaxınlarda doğulmuş ilk övladı – oğlu ilə daha çox vaxt keçirmək istəyir.

1986-cı il avqustun 27-də doğulan Sebastyan Kurts Vyana Universitetinin hüquq fakültəsini bitirib. Vyana Şəhər Şurasının üzvü, inteqrasiya işləri üzrə dövlət katibi, xarici işlər naziri postlarını tutub. 2017-2019-cu illərdə kansler kürsüsündə əyləşib, 2020-ci ildən yenidən hökumətə başçılıq edib.

2021-ci il oktyabrın 9-da Sebastyan Kurts istefa verib, qərarını ölkə prokurorluğunun onu, eləcə də yaxın çevrəsindəki doqquz şəxsi korrupsiya və rüşvətdə şübhəli bilərək araşdırma aparması ilə bağlayıb.

Oktyabrın 11-dən ölkəyə onun partiyadaşı Aleksandr Şallenberq kanslerlik edir. Sebastyan Kurtsun siyasətdən ayrılmaq qərarından az sonra Aleksandr Şallenberqin kanslerlikdən istefası barədə xəbərlər yayılıb.

Avstriyada hökumət parlamentin 183 yerlik aşağı palatasına seçkinin nəticələri əsasında qurulur. İndiki hökuməti Xalq Partiyası ilə Yaşıllar Partiyası formalaşdırıb.