“Qızıl top” tarixçəsi
Novator.az futbolda ən nüfuzlu fərdi təltif sayılan “Qızıl top” mükafatının tarixinə nəzər salıb.
Fransanın “France Football” jurnalının təsis etdiyi mükafatın 1956-1994-cü illərdəki qaydası yalnız Avropada oynayan yerli futbolçunu təltif etməyi nəzərdə tutub.
1995-ci ildən avropalı olmayan futbolçunu da təltif etmək imkanı yaradılıb.
2007-ci ildən təltif qaydası bir daha yenilənib, futbolçunun çıxış etdiyi məkana məhdudiyyət götürülüb, mükafatın Avropanın deyil, dünyanın ən yaxşı futbolçusuna verilməsinə başlanıb.
1956-2009-cu illərdə “Qızıl top” jurnalistlər arasında keçirilən sorğunun nəticələrinə əsaslanıb (2007-ci ilədək sorğuya yalnız avropalı jurnalistlər buraxılıb).
2010-2015-ci illərdə “France Football” mükafatı FİFA ilə birgə verib. Həmin müddətdə sorğulara milli komandaların baş məşqçiləri və kapitanları da qatılıb.
2016-cı ildən “Qızıl top”u yenə “France Football” təkbaşına verir, təltif jurnalistlər arasında sorğunun nəticələrinə əsaslanır.
Mükafatı ən çox Lionel Messi (Argentina) alıb: 7 dəfə.
Kriştiano Ronaldonun (Portuqaliya) 5 “Qızıl top”u var.
Yohan Kroyf (Niderland), Mişel Platini (Fransa), Marko van Basten (Niderland) 3 dəfə “Qızıl top”a sahib çıxıblar.
Bu futbolçulara 2 “Qızıl top” verilib: Alfredo Di Stefano (İspaniya), Frans Bekkenbauer (Almaniya), Kevin Kiqan (İngiltərə), Karl-Haynts Rummenigge (Almaniya), Ronaldo (Braziliya).
1 mükafatı olan futbolçular belə sıralanır: Stenli Metyuz (İngiltərə), Raymond Kopa (Fransa), Luis Suares Miramontes (İspaniya), Omar Sivori (İtaliya), Yozef Masopust (Çexoslovakiya), Lev Yaşin (SSRİ), Denis Lou (İngiltərə), Eysebio (Portuqaliya), Bobbi Çarlton (İngiltərə), Florian Albert (Macarıstan), Corc Best (Şimali İrlandiya), Canni Rivera (İtaliya), Gerd Müller (Almaniya), Oleq Bloxin (SSRİ), Alen Simonsen (Danimarka), Paolo Rossi (İtaliya), İqor Belanov (SSRİ), Ruud Qullit (Niderland), Lotar Matteus (Almaniya), Jan-Pyer Papen (Fransa), Roberto Bacco (İtaliya), Xristo Stoiçkov (Bolqarıstan), Corc Vea (Liberiya), Mattias Zammer (Almaniya), Zinəddin Zidan (Fransa), Rivaldo (Braziliya), Luiş Fiqu (Portuqaliya), Maykl Ouen (İngiltərə), Pavel Nedved (Çexiya), Andrey Şevçenko (Ukrayna), Ronaldinyo (Braziliya), Fabio Kannavaro (İtaliya), Kaka (Braziliya), Luka Modriç (Xorvatiya).
Mənbə: Francefootball.fr
