Canni De Byazi qaldı
Azərbaycanın milli futbol komandasının baş məşqçisi Canni De Byazi ilə müqavilə 2022-ci ilin oktyabr ayına qədər uzadılıb. Qərarı dekabrın 2-də AFFA-nın İcraiyyə Komitəsi qəbul edib.
İtalyan Canni De Byazi baş məşqçi postunu 2020-ci il iyulun 10-dan tutur, ilk müqavilənin müddəti noyabrın 30-da başa çatıb. Novator.az bildirir ki, milli komanda Canni De Byazinin dövründə 2 qələbə əldə edib, 12 məğlubiyyət alıb, 6 oyunu heç-heçə bitirib.
2020-ci ildə UEFA Millətlər Liqasının qrup raundunda Lüksemburqla 1:2 və 0:0, Kiprlə 0:0 və 1:0, Monteneqro ilə 0:0 və 0:2 hesabları qeydə alınıb.
2021-ci ildə dünya çempionatının seçmə mərhələsində yığma bu nəticələrə imza atıb: Portuqaliya – 0:3 və 0:1, Serbiya – 1:2 və 1:3, İrlandiya – 0:3 və 1:1, Lüksemburq – 1:3 və 1:2.
2020-ci ildə Sloveniya ilə (0:0), 2021-ci ildə Qətər (2:2, 1:2), Türkiyə (1:2), Moldova (0:1) və Belarusla (2:1) yoldaşlıq görüşləri də keçirilib.
1956-cı il təvəllüdlü Canni De Byazi futbolçu karyerası ərzində ölkəsində bir çox klubun, o cümlədən “İnter”, “Peskara”, “Breşia”, “Palermo”, “Viçensa” komandalarının yarımmüdafiəçi olub.
Məşqçi kimi Canni De Byazi bir çox komandada, o cümlədən İtaliyanın “Karpi”, SPAL, “Modena”, “Breşia”, “Torino”, “Udineze”, İspaniyanın “Levante”, “Alaves” klublarında çalışıb, Albaniya milli komandasına baş məşqçilik edib.
