7-ci qızıl
Argentinalı ulduz Lionel Messi Fransanın “France Football” jurnalının sorğusunda 2021-ci ilin ən yaxşı futbolçusu seçilərək “Qızıl top” mükafatı alıb. Novator.az bildirir ki, bu, Lionel Messinin 7-ci “Qızıl top”udur. O, 2009, 2010, 2011, 2012, 2015, 2019-cu illərdə də “Qızıl top”a sahib çıxıb.
1956-cı ildə yaradılan, 2010-2015-ci illərdə FİFA ilə birgə verilmiş “Qızıl top” mükafatı hazırda FİFA üzvü olan hər ölkədən bir jurnalistin cəlb edildiyi sorğunun nəticələrinə əsaslanır. Azərbaycanı sorğuda tanınmış futbol icmalçısı Rasim Mövsümzadə təmsil edir.
Lionel Messi 2009 və 2019-cu illərdə FİFA-nın sorğusu əsasında dünyanın ən yaxşı futbolçusu seçilib. Hazırda bu sorğuya milli komandaların baş məşqçiləri, kapitanları və FİFA ölkələrinin hərəsindən bir jurnalist qatılır.
1987-ci il iyunun 24-də Argentinanın Rosario şəhərində doğulan Lionel Messi 2004-cü ildən yetirməsi olduğu İspaniyanın “Barselona” klubunda oynayıb, 10 dəfə İspaniya çempionu, 4 dəfə UEFA Çempionlar Liqasının qalibi olub, 3 dəfə UEFA superkubokunu əldə edib, 3 dəfə klublar arasında dünya çempionluğunu qazanıb.
2021-ci ilin avqustundan Lionel Messi Fransanın “Pari Sen-Jermen” (PSJ) komandasında çıxış edir.
2005-ci ildən Argentina milli komandasının formasını geyinən Lionel Messi olimpiya çempionu (2008), dünya çempionatının gümüş mükafatçısı (2014), Amerika kubokunun sahibidir (2021).
