Qırğızıstan seçkisinin ilkin nəticələri
Qırğızıstanda noyabrın 28-də keçirilmiş parlament seçkisinin ilkin nəticələri açıqlanıb. Novator.az bildirir ki, Mərkəzi Seçki Komissiyasının hesabatına görə, 54 deputatın müəyyənləşdiyi proporsional sistem üzrə 6 partiya 5 faizlik həddi keçərək parlamentə düşə bilib. Ata-Yurd Qırğızıstan Partiyasının 15, İşenim Partiyasının 12, Intımak Partiyasının 9, Alyans Partiyasının 7, Bütün Qırğızıstan Partiyasının 6, Iyman Nuru Partiyasının 5 mandat əldə etdiyi xəbər verilir.
Rəsmi açıqlamaya əsasən, majoritar sistem üzrə 36 dairənin 34-də qalib müəyyənləşib. 2 dairədə təkrar seçki keçiriləcəyi vurğulanır.
Ata Məkan, Sosial Demokrat, Uluttar Birimdiqi və Azadlıq partiyaları seçkinin nəticələrini tanımadıqlarını bəyan ediblər.
Qırğızıstanda 2021-ci il aprelin 11-də keçirilmiş referendumda yeni konstitusiya qəbul olunub, ölkə prezident idarə üsuluna keçib. Hazırda prezident həm dövlət başçısı, həm də hökumət başçısıdır. Nazirlər Kabineti üzvləri parlamentin razılığı ilə təyin olunur.
Parlament deputatlarının sayı 120-dən 90-na enib, tam proporsional sistem aradan qaldırılıb.
Əvvəllər Qırğızıstan parlament respublikası idi, ali icraedici orqan statusu daşıyan hökuməti 120 yerlik parlamentdə deputatların yarıdan çoxunu təşkil edən siyasi qüvvə qururdu. 2020-ci il oktyabrın 4-də keçirilmiş parlament seçkisinin nəticələri üsyana səbəb olub, nəticələr ləğv edilib, prezident Sooronbay Jeenbekov istefa verib. 2021-ci il yanvarın 10-da Sadır Japarov prezident seçiləndən sonra ölkədə idarəetmənin yenilənməsinə başlanıb.
