Aşqabadda toplantı
Noyabrın 28-i Türkmənistanın paytaxtı Aşqabadda İqtisadi Əməkdaşlıq Təşkilatının zirvə toplantısı keçirilib. Azərbaycan prezidenti İlham Əliyev toplantıda iştirak edib.
Dövlət başçısının Türkmənistana səfəri həmin gün başlayıb, o, həmkarı Qurbanqulu Berdiməhəmmədovla görüşüb.
İqtisadi Əməkdaşlıq Təşkilatını 1985-ci ildə İran, Pakistan, Türkiyə yaradıb, 1992-ci ildə quruma Əfqanıstan, Azərbaycan, Qazaxıstan, Qırğızıstan, Özbəkistan, Tacikistan, Türkmənistan da qoşulub.
İlham Əliyev 28 noyabr toplantısındakı çıxışında Azərbaycan iqtisadiyyatının son 18 ildə sürətlə inkişaf etdiyini, ümumi daxili məhsulun üç dəfədən çox artdığını vurğulayıb: “Genişmiqyaslı islahatlar nəticəsində Azərbaycanda münbit sərmayə iqlimi yaradılıb. Dünya Bankının “Doing Business” hesabatında Azərbaycan 190 ölkə arasında 28-ci yerdə qərarlaşıb. Azərbaycan iqtisadiyyatına 280 milyard ABŞ dolları həcmində sərmayə yatırılıb, bunun da yarısı xarici sərmayədir.
Bizim strateji valyuta ehtiyatlarımız xarici dövlət borcumuzdan 6 dəfə çoxdur. Azərbaycanın xarici borcu ölkənin ümumi daxili məhsulunun, sadəcə, 17,3 faizini təşkil edir. Biz 2030-cu ilin sonuna qədər bu rəqəmi 10 faizə endirməyi planlaşdırırıq.
Ötən 18 il ərzində Azərbaycanda yoxsulluq səviyyəsi 49 faizdən 6 faizə enib. Ölkədə işsizlik təqribən 6 faiz səviyyəsindədir”.
Dövlət başçısı 2020-ci ildə Azərbaycan ərazilərinin 30 ilə yaxın davam edən işğalına son qoyulduğunu xatırladıb: “44 günlük Vətən müharibəsi Ermənistanın məğlubiyyəti və 2020-ci il noyabrın 10-da kapitulyasiya aktı imzalamasına məcbur edilməsi ilə nəticələndi. Azərbaycan özü öz ərazi bütövlüyünü bərpa etdi. Azərbaycan özü BMT Təhlükəsizlik Şurasının 1993-cü ildə qəbul etdiyi, Ermənistan silahlı qüvvələrinin Azərbaycanın işğal olunmuş ərazilərindən dərhal, tam və qeyd-şərtsiz çıxarılmasını tələb edən dörd qətnamənin icrasını təmin etdi.
İşğal dövründə həmin ərazilərdə bütün şəhər və kəndlər, o cümlədən mədəni və dini irs abidələri yerlə-yeksan edilib. Bütün müsəlmanlara qarşı təhqir və nifrət zəminində Ermənistan bizim məscidləri dağıdıb və təhqir edib. İşğal dövründə həmin ərazilərdə 67 məsciddən 65-i tamamilə dağıdılıb, digər iki məscidə isə ciddi zərər dəyib. Qəbiristanlıqlar da vandalizmə məruz qalıb.
Ərazilərin azad olunmasından dərhal sonra biz genişmiqyaslı yenidənqurma işlərinə başlamışıq, artıq onların ilkin nəticələri var. Azərbaycan yalnız özünün maliyyə resurslarına arxalanaraq sıfırdan yeni şəhər və kəndlər salır. Bu il bu məqsədlərə dövlət büdcəsindən 1,3 milyard ABŞ dolları ayrılıb. 2022-ci ildə də bu işlərə ən azı eyni həcmdə vəsait ayrılacaq”.
Zirvə toplantısına Türkmənistan, Türkiyə, İran, Pakistan, Özbəkistan, Qırğızıstan, Tacikistan prezidentləri, Qazaxıstanın baş naziri, İqtisadi Əməkdaşlıq Təşkilatının baş katibi də qatılıblar.
