Soçi səfəri başlayıb
Noyabrın 26-da prezident İlham Əliyev həmkarı Vladimir Putinin dəvəti ilə Rusiyanın Soçi şəhərinə gedib.
İşgüzar səfərin başladığı xəbərini AZƏRTAC yayıb.
Soçidə İlham Əliyev və Vladimir Putinin, Ermənistanın baş naziri Nikol Paşinyanın üçtərəfli görüşü keçiriləcək. Vladimir Putinin təşəbbüsü olan görüşdə üç liderin 10 noyabr 2020-ci il və 11 yanvar 2021-ci ildə imzaladıqları bəyanatlarla bağlı məsələlərin müzakirə ediləcəyi bildirilir.
Ermənistan 1988-1994-cü illərin təcavüzündə Azərbaycanın bütün cənub-qərbini ələ keçirib.
2020-ci il sentyabrın 27-dən Azərbaycanın apardığı hərbi əməliyyatlarda Cəbrayıl, Füzuli, Zəngilan, Qubadlı, Şuşa şəhərləri, bu rayonların, eləcə də Xocavənd, Xocalı, Laçın rayonlarının, keçmiş Ağdərə rayonunun bir çox məntəqəsi azad olunub.
Noyabrın 10-na keçən gecə Azərbaycan prezidenti İlham Əliyev, Ermənistanın baş naziri Nikol Paşinyan və Rusiya prezidenti Vladimir Putin birgə bəyanat imzalayıblar. Hərbi əməliyyatlar dayandırılıb, Yuxarı Qarabağda və Ermənistana gedən Laçın yoluna Rusiyanın sülhməramlı kontingenti yerləşdirilib.
Dekabrın 1-dək Ağdam, Kəlbəcər, Laçın rayonları Azərbaycana qaytarılıb.
Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun bir hissəsi işğalda qalır.
Laçın şəhəri və rayonun 6 kəndi Rusiya Ordusu bölmələrinin əlindədir.
2021-ci il yanvarın 11-də İlham Əliyev, Nikol Paşinyan və Vladimir Putinin Moskvada imzaladıqları birgə bəyanatla regionda bütün iqtisadi əlaqələrin və nəqliyyat əlaqələrinin bərpasını reallaşdırmaq məqsədilə üç ölkənin baş nazirlərinin müavinlərinin həmsədrliyi ilə işçi qrup yaradılıb.
Novator.az bildirir ki, İlham Əliyev və Nikol Paşinyan daha bir görüşə razılıq veriblər. Onlar dekabrın 15-i Avropa İttifaqının Şərq tərəfdaşlığı sammitinin keçiriləcəyi Belçika paytaxtı Brüsseldə bir araya gələcəklər. Görüş razılığını Avropa İttifaqı Şurasının prezidenti Şarl Mişel alıb.
