Qətər yolunda yeni püşk
Noyabrın 26-da Avropadan 2022-ci ilin dünya futbol çempionatına son üç vəsiqə uğrunda oyunların püşkü atılıb. Novator.az nəticələri təqdim edir:
A yolu
Şotlandiya – Ukrayna
Uels – Avstriya
B yolu
Rusiya – Polşa
İsveç – Çexiya
C yolu
İtaliya – Şimali Makedoniya
Portuqaliya – Türkiyə.
Yarımfinal və final oyunları 2022-ci ilin mart ayına təyin olunub.
2022-ci ildə (21 noyabr-18 dekabr) Qətərdə keçiriləcək final mərhələsinə 32 vəsiqənin 1-i çempionat sahibi Qətərə verilib.
Avropaya ayrılan 13 yerin 10-u tutulub: Serbiya, İspaniya, İsveçrə, Fransa, Belçika, Danimarka, Niderland, Xorvatiya, İngiltərə, Almaniya final raunduna keçiblər.
Qətərdə Afrikanı 5 komanda təmsil edəcək. Həmin vəsiqələrə bu iddiaçılar qalır: Əlcəzair, Kamerun, Konqo Demokratik Respublikası, Misir, Qana, Mali, Mərakeş, Nigeriya, Seneqal, Tunis.
4 vəsiqəli Asiyada mübarizəni bu yığmalar davam etdirir: İran, Cənubi Koreya, BƏƏ, Livan, İraq, Suriya, Səudiyyə Ərəbistanı, Yaponiya, Avstraliya, Oman, Çin, Vyetnam.
Cənubi Amerikadan Braziliya və Argentina final mərhələsinə vəsiqəni təmin ediblər. Qalan 2 biletə iddiaçılar bunlardır: Ekvador, Kolumbiya, Peru, Çili, Uruqvay, Boliviya, Paraqvay, Venesuela.
Şimali və Mərkəzi Amerikanın 3 vəsiqəsi var. Mübarizəni bu yığmalar aparır: Kanada, ABŞ, Meksika, Panama, Kosta Rika, Yamayka, Salvador, Honduras.
2 vəsiqə Asiya təmsilçisi ilə Cənubi Amerika təmsilçisi, Şimali və Mərkəzi Amerika təmsilçisi ilə Okeaniya təmsilçisi arasında əlavə oyunlarda müəyyənləşəcək.
1930-cu ildən keçirilən dünya çempionatlarında Braziliya 5 dəfə, İtaliya və Almaniya 4 dəfə, Uruqvay, Argentina və Fransa 2 dəfə, İngiltərə və İspaniya 1 dəfə qızıl medallara sahib olub.
