Klub reytinqində
UEFA-nın klub turnirlərində 2021-2022 mövsümünün qrup mərhələsi başa çatmaq üzrədir. Çempionlar Liqası, Avropa Liqası və Konfrans Liqasının hər birində 32 klub yer alır. Konfrans Liqasında Azərbaycanı təmsil edən “Qarabağ” komandasının növbəti raunda çıxması dəqiqləşib.
Azərbaycan UEFA-nın klub reytinqində 25-ci pillədədir. Novator.az bildirir ki, Rusiya 10-cu, Ukrayna 11-ci, Türkiyə 16-cı, Qazaxıstan 30-cu, Belarus 32-ci, Moldova 33-cü, Litva 34-cü, Latviya 38-ci, Ermənistan 43-cü, Estoniya 45-ci, Gürcüstan 46-cı pillədə qərar tutub.
55 üzvü olan UEFA-nın klub reytinqi turnirlərdə son beş mövsümdə qazanılan əmsala əsaslanır. Təsnifat mərhələlərində qələbə 1 xal, heç-heçə yarım xal, qrup mərhələsində, 1/8 final, 1/4 final, yarımfinal və finalda qələbə 2 xal, heç-heçə 1 xaldır.
Çempionlar Liqasının qrup mərhələsi 4 bonus xalı, 1/8 finalı 5 bonus xalı, 1/4 finalı, yarımfinalı və finalı 1 bonus xalı verir.
Avropa Liqasında qrup qalibi olmağa 4 bonus xalı, qrupda ikinci yeri tutmağa 2 bonus xalı, 1/8 finala, 1/4 finala, yarımfinala və finala adlamağa 1 bonus xalı düşür.
Konfrans Liqasında qrup qalibi olmaq 2 bonus xalı, qrupda ikinci yeri tutmaq 1 bonus xalı, yarımfinal və final 1 bonus xalı qazandırır.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
Bu mövsüm Azərbaycan 4,375 əmsal əldə edib. Ümumi əmsal 17,000-dir.
